Fr├ęttir | 18. september 2023 - kl. 21:37
Leikmenn heiðraðir á lokahófi

Kormákur Hvöt hélt lokahóf sitt á laugardaginn, sama dag og liði sigraði í síðasta leik sínum á tímabilinu og komst upp í 2. deild. Að venju voru leikmenn sem skarað hafa framúr í sumar heiðraðir. Leikmaður ársins meðal stuðningsmanna var markmaðurinn Uros Duric. „Hann stóð undir öllum væntingum og vel það. Enginn markmaður hélt oftar hreinu en hann, en Kormákur Hvöt var það lið í deildinni sem fékk fæst mörk á sig. Besti markmaður í sögu liðsins,“ segir á Aðdáendasíðu Kormáks á Facebook.

Leikmaður ársins meðal leikmanna var Ismael Sidibe. Hann skoraði 21 mark í 20 leikjum í sumar, algert naut á velli og martröð varnarmanna í deildinni. Sjálfboðaliði ársins var Sigurður Bjarni Aadnegard. „Vantar að skutla einhverjum eitthvert? Siggi. Vantar að selja happdrættismiða eða þvo búningana? Siggi. Vantar markmann í síðustu þrjá leikina? Siggi. Alger lykilmaður í öllu starfi Kormáks Hvatar,“ segir á Aðdáendasíðunni.

Liðsfélagi ársins var Pap Diounkou. „Brosmildi bakvörðurinn er hvers manns hugljúfi á æfingum, í vinnunni og bæjarlífinu. Hvernig hann fékk 10 gul spjöld í 19 leikjum í sumar er rannsóknarefni.“

Mark & móment ársins fékk Orri Arasyni í skaut. „Sigurmark gegn liðinu sem var að anda í hálsmálið á okkur í lokaumferðunum, eftir að hafa lent tvisvar undir. Í uppbótartíma. Svakalegt. Orri kom gríðarlega sterkur inn í liðið í sumar og sýndi engum neina miskunn, en þetta var kremið ofan á þá köku.“

Meðfylgjandi myndir eru fengnar frá Aðdáendasíðu Kormáks á Facebook.

Höf. rzg

Húnahornið - Fréttavefur allra Húnvetninga