Bjarni Jónsson og Bergþór Ólason, báðir þingmenn Norðvesturkjördæmis, hafa lagt fram á Alþingi í fimmta sinn tillögu til þingsályktunar um Alexandersflugvöll sem varaflugvöll fyrir Keflavíkur-, Reykjavíkur-, Akureyrar- og Egilsstaðaflugvelli. Vilja þeir að innviðaráðherra geri ítarlega athugun á kostum þess að gera Alexandersflugvöll á Sauðárkróki að varaflugvelli og að niðurstöður verði kynntar á Alþingi eigi síðar en 30. apríl 2024. Þingsályktunartillaga sama efnis var lögð fram á 144., 150., 151. og 152. löggjafarþingi.

Í greinargerð með tillögunni segir að kostir Alexandersflugvallar séu ótvíræðir, m.a. góð landfræðileg lega Alexandersflugvallar sem sé mjög heppileg með tilliti til jarðhræringa og/eða eldgosa sem hamlað geti flugsamgöngum. Þá séu samgöngur á landi traustari yfir vetrartímann á milli Sauðárkróks og Reykjavíkur en á milli Akureyrar og Reykjavíkur, eins og komið hafi í ljós þegar landleiðin að Keflavíkurflugvelli lokaðist vegna ófærðar síðastliðinn vetur og truflun varð einnig á samgöngum við Akureyri, ekki einungis um Akureyrarflugvöll heldur einnig landleiðina.

Tillöguna má sjá hér.