Mikið er það góð tilfinning að upplifa það að fá að vera með vorið vistað í sálinni og finna allt springa út frá degi til dags. Jafnt sálartetrið, mannlífið og gróðurinn. Lífið er eins og það er og það fer sínu fram. Það streymir endalaust áfram og ekkert fær það stöðvað þótt við náum kannski ekki alltaf að höndla það til fulls eins og við hefðum mögulega viljað. Samt heldur það endalaust áfram og nærir okkur og blessar, þrátt fyrir allt, nánast sama hver staðan er.

Gefum lífinu tækifæri og njótum þess að vera með. Að njóta stundarinnar í þakklæti fyrir sigur lífsins og fyrir höfund og fullkomnara lífsins sem til þess sá og gefur okkur daglega endalausa von og takmarkalausa elsku sína, fyrirgefningu og náð í öllum aðstæðum. Af því hann elskar okkur út af lífinu.

Þess vegna þökkum við þér fyrir lífið

Þess vegna þökkum við þér miskunnsami og elskuríki Guð fyrir lífið, fyrir vorið í sálum okkar og umhverfi með tilhlökkun og eftirvæntingu vegna sumarsins sem koma skal og kemur alltaf aftur og aftur.

Við þökkum þér fyrir að vaka yfir okkur í vetur og sleppa ekki hendi þinni af okkur. Haltu áfram að blessa lífið okkar og varðveita það í þér sem ert lífið sjálft.

Blessaðu fólkið okkar allt og gefðu okkur að fá að upplifa ævintýri og fegurð sumarsins og samskiptanna við hvert annað. Að fá að njóta daganna og björtu náttanna. Veittu þinni eilífu sumarsins sælu, birtu og yl inn í sál okkar og líf og uppörvaðu okkur með anda þínum. Hjálpaðu okkur að nærast af nærveru þinni og þínu lífgefandi, kærleiksríka og friðgefandi orði. Leyfðu okkur ávallt að fá að dvelja í faðminum þínum og fylgdu okkur eftir og leiddu í gegnum daginn hvern, hverja áskorun. Jafnt í gleði og raunum. Haltu áfram að þroska okkur og gera okkur þakklátari og heilli í þér.

Forðaðu okkur frá slysum og hættum og hverskyns sjúkdómum og óáran, illindum og leiðindum. Hjálpaðu okkur að létta lundina svo brúnin lyftist svo brosið hlýja og bjarta komist að. Brosið sem bræðir hjörtun. Gef að það mætti svo smitast frá hjarta til hjarta og við ná að upplifa fegurð og tilgang lífsins.

Gef okkur að lifa alla daga allan ársins hring með vorið vistað í sálinni, sólina og eilíft sumar í hjarta. Því hamingjan felst í því að vera með himininn í hjartanu.

Guð gefi ykkur öllum gleðilegt sumar.

Með kærleiks- samstöðu- og friðarkveðju.

- Lifi lífið!

Höfundur er ljóðskáld og rithöfundur og aðdáandi lífsins.