Pistlar | 23. júlí 2021 - kl. 09:25
Bæn fyrir nýfæddum börnum
Eftir Sigurbjörn Þorkelsson

Almáttugi skapari, þú höfundur og fullkomnari lífsins!

Þakka þér fyrir dásamlegt undur sköpunar þinnar. Þakka þér fyrir lífið og fegurð þess, leyndardóma og tilgang. Blessaðu nýfædd börn þessa heims. Við biðjum þig að halda þinni eilífu verndarhendi yfir þeim. Leyfðu þeim að þroskast, dafna og vaxa á sem eðlilegastan hátt og blessaðu foreldra þeirra og þau önnur sem að uppeldi þeirra kunna að koma með einum eða öðrum hætti. Blessaðu svo lífsgöngu allra barna þinna og samskipti þeirra við samferðamenn. Hjálpaðu okkur að sýna þeim hlýju og kærleiksríka umhyggju, skilning og þolinmæði. Aga þau í kærleika en skamma þau ekki svo þau fái blómstrað sem fallegast og best eftir þeim náðargjöfum sem þú hefur og vilt úthluta þeim.

Gefðu að þau mættu fá að heyra um náð þína og miskunn, kærleika, fyrirgefningu og frið og þá djúpu lífsins hamingju sem því fylgir í öllum aðstæðum lífsins. Líka í þeim erfiðu og sáru. Þegar mótlæti eða vonbrigði kunna að sækja á, möguleg óásættanleg höfnun eða ranglæti. Vilt þú þá leyfa þeim að finna fyrir þinni umvefjandi huggandi og nærandi, uppörvandi og huggandi nærveru, sem og í öllum öðrum aðstæðum.

Gef þeim að upplifa að þau eru valin í lið lífsins og fá að spila með þér til eilífs sigurs, þrátt fyrir allt sem kann að mæta þeim í þeim flókna leik sem lífið er eða ævigangan öllu heldur.

Forðaðu þeim frá öllu illu og leið þau frá slysum og hættum, sjúkdómum og hvers konar ranglæti, óáran, háska og tjóni og leið þau í gegnum lífið og örugglega heim í himininn þinn þegar ævi þeirra lýkur.

Viltu umvefja þau, blessa og leiða með styrkri kærleiks- og friðgefandi lífsins hendi þinni um langa og farsæla ævi og veita þeim af þínum anda og visku úr þínum lífgefandi kærleiks- og friðarbrunni svo þau geti orðið þér til dýrðar, samferðafólki sínu til blessunar og þannig sjálfum sér til farsældar og heilla.

Þess biðjum við þig samkvæmt þínu boði í frelsarans Jesú nafni. Amen.

Með samstöðu- kærleiks- og friðarkveðju.

- Lifi lífið!

Höfundur er ljóðskáld og rithöfundur og aðdáandi lífsins.

Höf. rzg

Húnahornið - Fréttavefur allra Húnvetninga