Pistlar | 11. desember 2021 - kl. 09:30
Draft að nöldri um nöldur
Eftir Guðjón Heiðar Pálsson

Nöldri nöldrar hér á Nöldrinu um spennandi tíma framundan. Nöldri, hvort sem hann er hún eða öfugt, upplýsir að tímarnir framundan vörðuðu framtíðina einsog það væri eitthvað nýtt.

Nöldri flokkar fólk og telur það bara allt í lagi á þessum dögum; segir suma sátta, aðra ósátta og enn aðra mjög ósátta við að alþingiskosningarnar séu yfirstaðnar. Maður bara spyr sig afhverju sumir og aðrir og enn aðrir eru ósáttir við það, ekki getum við endalaust kosið samkvæmt niðurstöðu manna í Alþingisbransanum. Nöldri talar ekki um að sumir séu sáttir, aðrir ósáttir og enn aðrir mjög ósáttir við þessu meintu úrslit. Meintu sko! Veit einhver hver úrslitin voru? Ég bara spyr hvort Lýðveldið Ísland hafi dáið 25. nóvember, þennan dag þarna þegar Alþingi „allra landsmanna“ samþykkti óljós útslit „kosninganna“. Erum við þá núna í alþýðulýðveldinu Íslandi? Þau verða akkúrat svona til með valdinu, eða sirka. Allt samt mjög alþýðulegt.

Nöldri telur að sameining fjögurra sveitarfélaga sé voðalega sniðugt. „Sanniði til“ segir Nöldri kokhraustur og er viss um að það gerist. Einmitt. Nöldri segist viss um að íbúar hafi áttað sig á einhverri ónefndri þörf fyrir sameiningu. Og núna aftur um eilífar kosningar: Nöldri upplýsir um að þögnin ein hafi næstum því orðið framundan milli tveggja félaga, sveitarfélaga. Munaði bara tveimur atkvæðum þögninni í óvil. Jöfn atkvæði hefði þýtt þá að helmingurinn hefði talað, hinn þagað. Spurning hvoru megin sveitar það hefðu orðið (skiptir kannski engu hvorum megin atkvæðin lenda einsog í Alþingiskosningunum).

Ég sé bara ekkert gott við það að fara úr fjórum félögum í eitt, einsog Nöldri vill. Hljómar einsog afsökun fyrirtækja í Reykjavík. Samlegðaráhrif. Bendi bara á að enginn hefur afsannað að lítið sé verra en stærra. Og hvað á að gera við öll bjargráðin sem eru nú þegar til í hverju sveitarfélagi? Kannski skilvirkt að eiga fernt af flestu. Eða selja kirkjurnar, hafa bara eina. Sameina golfvellina, hafa bara einn. Samlegð í því að fækka sextán hornum hvers sveitarfélags í fjögur. Nöldri ætti að vera ánægður með það. Kannski hægt að hafa bara eitt horn? Hvað segir Nöldri við því? Nei kva – Nöldri meinar öruggleg að við Íslendingar séum stórastir í stefnumótunarvinnunni og sú eðalvinna muni gefa eitthvað af sér í heildina og kannski fyrir hana - þótt reynslan sé reyndar sú að oftar er minna um sjálfa stefnuna en mótun hennar. Reyndar þarf enga stefnu til að fara eftir þegar þetta reddast allt saman og allt saman er best í alþýðulýðveldinu. Það er heppilegt. Eitt af öllu er best, fjögur verst. Það er heppilegt, eitt alþýðuríkiseitthvað. Einnig alþýðulegt að vera fleiri en einn sem getur auðvitað ekkert einn þótt þessir einu séu allir einstakir hver fyrir sig einsog öll nýsköpun er ein og stök hver fyrir sig. Saman hugsum við eins gáfulegt og það er.

Í stóra samhenginu skiptir fjöldinn auðvitað öllu máli fyrir suma ósátta og aðra mjög ósátta, hversu lítill fjöldinn verður. Bara að það verði ekki lengra til Húsavíkur. Talandi um stefnu. Nöldri þurfti endilega að segja frá skýrslu um stefnumörkun í ferðaþjónustu. Hefði nú haldið að þessi mörkun væri sjálf vinnan við að búa til stefnu - sem yrði sjálf einskonar skýrsla þegar vinnu lýkur við að marka hana. Afhverju er nú verið að búa til skýrslu um vinnuna? Er ég að ofhugsa þetta eitthvað?

Hvaða nöldur er þetta um fjárfestingar? Nöldri talar um að öll sveitarfélögin ættu að gera skýrslu um inniviði. Er samlegð í því? Með það í huga að fólk samþykkti í kosningum um að þegja ekki saman yfir bæjarmörkin þá væri kannski rétt að benda á að ein skýrsla dygði kannski fyrir fyrirhugað sveitarfélag. Eða er kannski bara betra eftir allt saman að eiga meira en minna, allar kirkjurnar og fjórar skýrslur um fjögur sveitarfélög í stað einnar um eitt sveitarfélag? Það er samlegð í því að fá mjög svo hlutlausa stefnumörkun í ferðaþjónustu fyrir alla innviðina fyrst þetta reddast ekki án mörkunar. Auðvitað eigum við að sameina ferðaþjónustu allra sveitarfélaganna, tala og skrifa á ensku, breyta staðarheitum einsog fyrirtækin gera, skilgreina íbúa nýja sveitarfélagsins sem ferðamenn af öllum kynjum og fækka þannig atvinnulausum sem óneitanlega fjölgar í stóra sveitarfélaginu. Held að Nöldri sé fjórkynja.

E.s. Er ekki meiri samlegðaráhrif í því að sameinast Hafnarfirði, stærra sveitarfélag?

Gleðilega spennandi tíma framundan,

Guðjón Heiðar, Kópavogsbúi

 

Höf. rzg

Húnahornið - Fréttavefur allra Húnvetninga