Kirkja Jesús Krists þarf að vera frjáls og verður að starfa í auðmýkt. Hún þarf að prédika fagnaðarerindið um hinn upprisna og lífgefandi frelsara fólki á öllum aldri og nálgast það með þeirra þarfir í huga og miða þjónustu sína við það. Kirkjan er öllum ætluð. Jesús sagði: "Komið til mín, öll þið sem erfiði hafið og þungar byrðar og ég mun veita ykkur hvíld." Og hann sagði líka: "Minn frið gef ég ykkur. Ekki gef ég eins og heimurinn gefur. Skelfist ekki né hræðist, trúið á Guð og trúið á mig." Ég mun ekki skilja ykkur eftir munaðarlaus." "Ég verð með ykkur alla daga, allt til enda veraldar." Og hann sagði: "Allt mitt er þitt." 

"Í húsi föður míns eru margar vistarverur..." "Ég er vegurinn, sannleikurinn og lífið. Enginn kemur til föðurins nema fyrir mig."  

Ekki spurning um að kunna eða vita allt best

Jesús sagði aldrei, komið til mín þið sem hafið allt ykkar á þurru, þið sem vitið alltaf allt best og hvernig allt gengur fyrir sig eða hvernig allt á að vera. Þið sem aldrei verðið fyrir vonbrigðum eða lendið í einhvers konar veseni.

Gleymum því ekki að frelsarinn Jesús marg ítrekaði að það eru allir velkomnir að fylgja honum og þannig tengjast kirkjunni hans sem stofnuð var á hvítasunnudag forðum fyrir heilagan anda Guðs.

Guð gefi kirkjunum okkar auðmýkt til að opna dyr sínar og faðm og virkja fólk til þátttöku og þjónustu með margbreytilegum og fjölbreyttum hætti. Í samstöðu með vitnisburði, kærleiksþjónustu, helgihaldi og samfélagi þar sem allir geta fundið sig jafnt sem gefendur og þiggjendur.

Við erum á krossgötum

Við erum núna á krossgötum, hvert og eitt okkar, sem einstaklingar, fjölskyldur, vinir, elskendur, þjóð og heimsbyggð. Við þurfum öll á því að halda að sameinast í bæn um að bjóða frelsarann okkar líf- og friðgefandi, Jesú, inn í líf okkar til að móta viðhorf okkar hvert til annars. Hann elskar okkur öll jafnt. Við erum öll Guðs óendanlega dýrmæta sköpun, elskuð skilyrðislaust af honum. Sköpuð til góðra verka og til að elska hvert annað.

Við erum allskonar og öll erum við syndarar sem þurfum á miskunn og náð Guðs að halda. Því þurfum við að styðja hvert annað í því að okkur sé öllum boðið að sitja saman til borðs með frelsara heimsins. Höfundi og fullkomnara lífsins. Þrátt fyrir ólíkan uppruna, misjafnar skoðanir og útfærslur á leiðum á ævinnar vegi.

Við erum öll eitt

Við erum öll eitt í Kristi. Öll sem þiggja viljum. Það snýst ekki um að vita, kunna eða skilja. Heldur að taka á móti í auðmýkt og þakklæti. Leyfum því svo að móta huga okkar og hjarta og sjást í augum okkar svo við eignumst von um framtíð bjarta. Öll saman. Í Jesú nafni.

Í kirkjunni á að vera pláss fyrir alla. Ekki síst börn. En líka okkur hin ólíku Guðs börn á öllum aldri sem þurfum á huggun og styrk, uppörvun og umvefjandi kærleika Guðs að halda sem einn megnar að gefa okkur þann frið í hjarta sem við flest raunverulega þráum innst inni.

Okkur hættir til að hugsa og jafnvel segja, já, en þessi eða hinn er nú svona eða hinsegin. Þau passa ekkert hérna inn af því að viðkomandi sagði einu sinni eða gerði eitthvað sem hefði nú betur verið ósagt eða gert.

Munum þá að kirkjan er fyrir alla og okkur er í sameiningu sem kirkja ætlað að mæta þörfum hvert annars.

Jesús sagði: "Dæmið ekki svo þið verðið ekki dæmd. Því að með þeim dómi sem þið dæmið, munuð þið dæmd verða og með þeim mæli sem þér mælið mun yður mælt verða."

Með kærleiks- og friðarkveðju.

   - Lifi lífið!

Höfundur er ljóðskáld og rithöfundur og aðdáandi lífsins.