Pistlar | 21. janúar 2023 - kl. 08:57
Eftir Snjólaugu M. Jónsdóttur
Margir hafa farið í gegnum ýmiskonar félagsstarf með börnum sínum og vita að þar liggur mikið starf að baki.
En hverjir eru það sem að halda öllu þessu félagsstarfi gangandi? Svarið er mjög einfalt, sjálfboðaliðar.
Hvað er það sem að liggur að baki íþróttastarfs og annarra félagsstarfa? Hvert er okkar hlutverk í þessu öllu saman?
Spurningarnar geta verið margar, hvað þarf að gera, hvenær á að gera, hvernig á að gera, hver á að gera og þetta getur haldið áfram svona endalaust.
Það er að mörgu að hyggja, það þarf að halda utan um allt félags- og íþróttastarfið og skipuleggja það. Það þarf að útdeila verkefnum og vinna þau.
En hvernig gerum við þetta?
Jú við gerum þetta með samvinnu. Sem foreldrar tökum við flest virkan þátt í félagsstarfi barna okkar eigin félagsstarfi auk þess að sinna okkar eigin félagsstarfi og áhugamálum.
Til þess að halda félagsstarfi á lífi þá verðum við öll að taka höndum saman og vinna að því í sameiningu að vera með öflugt og virkt félagsstarf, og já við þurfum að virkja unglingana og unga fólkið okkar líka.
Það geta allir lagt hönd á plóg og verið virkir í starfi.
Það vantar alltaf fólk til að aðstoða við íþróttamót, æfingar, ferðir og annað tengt starfinu.
Verkin eru misjöfn allt frá því að standa með skeiðklukkuna og taka tímann, taka myndir og skrá söguna, skrá niður skor/tíma, afhenda eða taka við númerum, sjá til þess að það sé kaffi fyrir þá sem að standa úti í öllum veðrum, fjáröflunin gangi vandræðalaust fyrir sig. Eða að allir fái pylsu á eftir þegar allt er búið.
Öll getum við gert gagn. En til þess að æfingarnar, æfingaferðirnar eða íþróttamótin verði að veruleika þarf líka fólk í brúnni til að skipuleggja.
Það geta allir sagt "en ég veit ekkert hvað ég á að gera". En málið er að við höfum öll staðið í þeim sporum bæði í sjálfboðaliðastarfi og annarri vinnu að vita ekki hvað maður á að gera eða hvernig. En það er það góða við það er að það er alltaf einhver sem að veit og getur miðlað sinni reynslu áfram. En ef enginn er til staðar til að taka við boltanum af þeim sem hafa reynsluna þá kemur að því einn daginn að fólkið fer og reynslan líka.
Nú fer að koma að þeim tíma ársins að aðalfundir íþróttafélagana eru haldnir og þar verður árið 2022 gert upp og áætlanir fyrir komandi starfsár lagðar fram.
Á aðalfundum verða einnig breytingar á stjórnum félaganna, ástæður fyrir stjórnarbreytingum eru mismunandi, sumir vilja snúa sér að öðrum áhugamálum, reglur geta sagt til um hversu lengi stjórnarmenn mega sitja í stjórn o.s.frv.
Það vantar alltaf áhugasamt fólk í stjórnir félaga, en það er ekki nóg að segja já ég skal vera í stjórn næsta tímabil. Því að oft er það nú þannig að eftir stendur samt sem áður einn aðili, kannski 2 og halda starfinu uppi. Jafnvel lenda félög í því að illa gengur að manna stjórnir og hvað á þá að gera?
Ég vona að þið hafið lesið þetta til enda en ef ekki og þið lesið bara það sem neðst er endilega rennið yfir þetta aftur og hugsið.
Ef ekki ég, þá hver?
Snjólaug M. Jónsdóttir