Fyrri mynd
Nsta mynd
...
Ok
Velkomin á vef Húnahornsins. Við notum vefkökur (e. cookies) til þess að bæta upplifun þína og greina umferð um síðuna.
Með því að nota vefsíðuna samþykkir þú notkun á vefkökum og skilmála okkar.
Hnahornið
Open Menu Close Menu
Hnahornið
Föstudagur, 1. mars 2024
   m/s
C
CW
huni.is - RSS-efnisveita
 
Mars 2024
SMÞMFL
252627282912
3456789
10111213141516
17181920212223
24252627282930
31123456
FyrriNúnaNæsti
Veðurstofa Íslands Vegagerðin
Holtavörðuh. 04:45 0 0°C
Laxárdalsh. 04:45 0 0°C
Vatnsskarð 04:45 0 0°C
Þverárfjall 04:45 0 0°C
Kjalarnes 04:45 0 0°C
Hafnarfjall 04:45 0 0°C
VegagerðinVestfirðirVestfirðirNorðurlandNorðausturlandVesturlandAllt landiðMiðausturlandSuðvesturlandSuðurlandSuðausturland
Nöldrið
18. ágúst 2023
Okur, íslenska og illgresi
Já komið þið sæl og blessuð. Nöldri er ekki dauður úr öllum æðum þó langt sé um liðið frá síðasta nöldurpistli. Af nógu er að taka í nöldrinu en ég ætla þó aðeins að nefna nokkur atriði að þessu sinni. Fyrst ætla ég að byrja á verðlaginu í Kjörbúðinni okkar hér á Blönduósi.
::Lesa
Leita í netfangaskrá
 
69. þáttur. Eftir Jón Torfason
25. febrúar 2024
Eftir Inga Heiðmar Jónsson
25. febrúar 2024
Eftir Sigurbjörn Þorkelsson
25. febrúar 2024
Eftir Sigurbjörn Þorkelsson
19. febrúar 2024
Frá Leikfélagi Dalvíkurbyggðar
16. febrúar 2024
68. þáttur. Eftir Jón Torfason
11. febrúar 2024
Eftir Inga Heiðmar Jónsson
11. febrúar 2024
Eftir Inga Heiðmar Jónsson
08. febrúar 2024
N 65 39' 32.04" V 20 16' 55.2"
Hallormasstaðaskóli. Mynd: FB/Hallormsstaðaskóli
Hallormasstaðaskóli. Mynd: FB/Hallormsstaðaskóli
Pistlar | 16. maí 2023 - kl. 10:56
Stökuspjall: Hugarperlur skarta
Eftir Inga Heiðmar Jónsson

1. Félagsmál:

Aðalfundur Sögufélagsins Húnvetnings verður haldin í salnum Þverbraut 1 á Blönduósi miðv.d. 24. maí kl. 14.
Gestur fundarins er Jón Jónsson þjóðfræðingur á Kirkjubóli í Strandabyggð.
Sögur af sérkennilegu fólki er heiti ræðunnar.
Verið velkomin!

2. Hér verða birtar nokkrar vísur frá hagyrðingamótinu á Hallormsstað haustið 1993:

3. Stakan mun ei falla frá
fjör er í andans glóðum.
Seinna eflaust sjáumst á
Sunnlendinga slóðum. Jói í Stapa

4. Víst má skreyta bleki blað
í Bragartúni kætast.
Nú á hýrum Hallormsstað
hagyrðingar mætast.

Þetta framtak þakka ber
þrotlaus elja réði.
Fornan tíma finn ég hér
fyllast þökk og gleði. Jón í Skollagróf

5. Oft er stakan unaðsleg
allra vekur hylli.
Ljóðin fljúga langan veg
landshornanna milli. Friðrik Ingólfsson Laugarhvammi

6. Séð og heyrt ég hef í kveld
hugarperlur skarta.
Staka lífgar ennþá eld
innst í þjóðarhjarta. Þorfinnur Jónsson Ingveldarstöðum

7. Enginn þarf að efa það
ort mun á þessu kvöldi.
Hittist nú á Hallormsstað
hagyrðingafjöldi. Jói í Stapa   

8. Á Hallormsstað var fimmta hagyrðingamótið haldið laugardagskvöldið 21. ágúst 1993. Þetta urðu árlegar samkomur, hófust á Skagaströnd 9. sept. 1989 þegar Jói og IHJ hóuðu í nokkra norðlenska vini og vísnasmiði til að snæða saman kvöldverð á hótelinu.

Vísurnar hér að ofan voru ortar í veislunni á Hallormsstað eða ortar fyrir veisluna og ferðavísurnar voru margar líflegar, hér birtast nokkrar sem ortar voru á austurleið.

9. Og gist var hjá Inga Tryggvasyni á Narfastöðum, góðum Iðunnarfélaga.

10. Margs er von á langri leið
að lenda hér í flokki slyngum
og setjast upp í svona reið
sem er full af hagyrðingum. Bjargey Arnórsdóttir Hofsstöðum í Geiradal

11. Hópurinn var heldur grár
hrukkóttur og lotinn.
Þó er andinn heiður, hár
hvergi niðurbrotinn. Jón Karlsson Gýgjarhólskoti

12. Í vændum eru vinamót
von er á stökum slyngum.
Rútan æði ferðafljót
full af hagyrðingum.

Leiða þvingar lífsfylling
ljóða yngja þingin.
Höldum slyngir heims um bing
hagyrðingahringinn. Jói í Stapa

13. Andrés Valberg varð að skotspæni á austurleiðinni. Þegar ekið var fram hjá Hreðavatni var rifjað upp hvernig Andrés var sér úti um mús til að stoppa upp með því að setjast niður hjá Grábrók á Jónsmessu árið 1991. Ýmsir tóku þátt í þessu skopi og Hilmar Pálsson frá Hjálmsstöðum kvað:
Andrés hann er allavega
ekki falskur.
En maðurinn er merkilega
múú-sikalskur.

Katrín Árnadóttir í Hlíð orti af meiri hógværð:
Ört er talað, engin þögn
efnið kætir landann.
Mikið getur músarögn
magnað skáldaandann.

Músarinnar var þó ekki fullhefnt, eða svo þótti BVG, enda felldi Skagfirðingurinn músina í Mýraumdæmi:
Andrés veitti öruggt hæli
einni í sínu lokastandi.
Engin hlaut slík eftirmæli
önnur mús á þessu landi. Bjarni Valtýr Guðjónsson Borgarnesi

14. Bjart er yfir Borgarfirði
blíðan, hún er góð sem slík.
En hún væri einskis virði
ef allir byggju í Reykjavík. Sigurjón Jónsson frá Skollagróf

15. Nú var farið að halla norður af Holtavörðuheiði og Andrés Valberg kvað:
Ljóðin falleg yrkja allir
Iðunn snjalla tóninn gaf.
Blómstra allar þankans þallir
þegar hallar norður af.

16. Þegar ekið var frá Arnarstapa niður að Varmahlíð, fann Jói fyrir nálægð æskustöðvanna:
Undan hallar, hýrnar vilji
heimbyggð kallar mig til sín
þó að fjallið þokan hylji
þá er falleg sveitin mín. Jói í Stapa

17. Jói fékk sér malt í öllum áningastöðum. Sigurjón flosaði:
Norðanmenn vita næstum allt
en nenna fáu að sinna.
Ef þeir drykkju meira malt
myndu þeir kannski vinna.

Og um sjálfan sig:
Í hægri fót ég hella fer
held vart stellingunum
þá orðin vella upp úr mér
eins og kellingunum.

Enn orti SJ
Hrossin plaga hal og snót
harla laga svörðinn
eru að naga oní rót
allan Skagafjörðinn. Sigurjón Jónsson frá Skollagróf

18. Að Narfastöðum var gist á austurleið og þangað barst kveðja frá Grími Lárussyni:
Ég sé í anda Sunnlendinga.
Svífur liðið kátt í hlað.
Berið kveðju Unni og Inga
ágæta að Narfastað. Grímur Lárusson frá Grímstungu

19. Kom að sunnan kvæðalið
kunna hitti vini.
Stund með Unni áttum við
og Inga Tryggvasyni. Ormur Ólafsson

20. Ból og stöðul hafði hér
hagyrðingasveitin glaða.
Og af fólki fullur er
fóðurgangur Narfastaða. Guðmundur Ingi Kristjánsson

21. Að morgni ók Iðunnarrútan til Mývatnssveitar og brátt sá til Belgjarfjalls:
Vindbelg sé ég vítt og hátt
veðurhaminn bera.
Mývetningamerki grátt
mun hann lengi vera. Sveinbjörn Beinteinsson

22. Vindbelg eg til vinstri sá.
Vindbelg forðum drottinn skóp.
Vindbelg hitta víða má
vindbelg kenni í okkar hóp. Jói í Stapa

23. Ári síðar, raunar hálfu ári, um hríðarhelgi í janúar 1994, hélt Jói upp á sjötugsafmæli sitt í Árgarði og Sigurður vinur hans og nágranni á Kringlumýri í Blönduhlíð kvað til hans afmælisljóð:

1.
Eitt miðsvetrarkvöld þegar mánaskin
markaði rúnir í svellin
og vökuljóð rímaði veröldin
um vatnið, Stapann og fellin.

2.
Þá gerðist það sem greint verður frá
að Guð var í önnum að skapa
með glampa í augum og glettni um brá
hann gerði Jóa frá Stapa.

3.
Af einstakri natni hann verkið vann
sem vitnar um stund og staður
en það vissi enginn þá nema hann
að þar fæddist listamaður.

4.
En síðan teljum við sjötíu ár
og sungið er enn frá Stapa
og Guð er víst næstum jafn náðarhár
þótt nú sé Jói að skapa.

5.
Ég komst að því sanna á kvöldinu fyrst
er kynntist ég Jóa frá Stapa
að eitt er sigur í íþrótt og list
annað að glíma og tapa.

6.
Megi söngur, gleði, sólskin og vor
við sjötugsaldur þinn ríma
með þökk fyrir mikilvæg mörkuð spor
í menningu okkar tíma. Sigurður Hansen/Feykjur bls. 46

Heimildir:
Hagyrðingamót 1993 að Hallormsstað
– Útgefandi og prentari: Guðm. Ingi Jónatansson Dalvík
Ljóð og vísur Jóa í Stapa á Húnaflóa vísnavef: https://bragi.arnastofnun.is/hunafloi/hofundur.php?ID=16279
Nýleg sögukorn: https://www.huni.is/index.php?pid=58&cid=20136

Ingi Heiðmar Jónsson

Höf. rzg
 
Prenta Prenta  
 
Til baka
 

©2024 Húnahornið