Á þessu ári hefur því verið fagnað vel og innilega og þess minnst með margvíslegum uppákomum að 100 ár eru frá því að fyrstu strákarnir héldu til dvalar í Vatnaskógi. Meðal annars kom út veglegt afmælisrit sem fróðlegt er að fletta og segir langa sögu í máli og ekki síst myndum. Og fyrri part næsta árs verða 125 ár frá því að æskulýðsfrumkvöðullinn farsæli, sr. Friðrik Friðriksson, stofnaði formlega æskulýðsfélögin KFUM og KFUK hér á landi. KFUM í janúar og KFUK í apríl, sem fyrir all nokkrum árum sameinuðust í eitt félag með eina stjórn.

Ævinlega þakklátur

Ég verð ævinlega þakklátur fyrir að hafa ungur að árum verið kynntur fyrir starfi KFUM og KFUK og fá svo þegar ég hafði aldur til að gerast þátttakandi í því litríka og fjölbreytta, mannbætandi æskulýðsstarfi. En foreldrar mínir og báðir afar og ömmur voru þátttakendur í starfinu frá unga aldri og föður afi minn og alnafni einn af stofnendum KFUM árið 1899.

Ég var síðan strax á unglingsaldri orðinn leiðtogi í starfi á meðal 9 – 12 ára drengja í Laugarneshverfinu. Allt var þetta mjög þroskandi á allan hátt. Mér voru falin verkefni og ábyrgð. Mér var gefið rými til að átta mig á sjálfum mér, rækta styrkleika mína, koma fram, taka ákvarðanir, skipuleggja og stjórna. Allt þetta slípaði mig til og veitti mér nauðsynlegt aðhald og sjálfsaga. Að sjá með hjartanu, hlusta á aðra, verða skilningsríkari, kærleiksríkari, umhyggjusamari og ábyrgari. Um leið og það jók mér frelsi til að móta trúarhugmyndir mínar og dýpka í samfélagi og þjónustu við höfund og fullkomnara lífsins, frelsara heimsins og okkar allra, Jesú Krist.

Þarf ekki að rembast í eigin mætti

Ég hef fengið að finna það að ég þarf ekki að rembast í eigin mætti eða sýna það og sanna hver ég sé með einhverri yfirborðs- eða sýndarmennsku. Ég er aldrei einn á ferð, því Jesús er mér við hlið og vill fá að leiða mig um lífsins veg og alla leiðina heim þegar yfir lýkur. Allt þetta hefur verið farvegur útrásar fyrir hugsjón mína, tilfinningar og sannfæringu.

Verð aldrei samur

Í starfi KFUM og KFUK á unglingsárum kynntist ég svo mínum lífs förunaut og elskulegu eiginkonu, nú til 39 ára. Synir okkar þrír hafa verið þátttakendur með einum eða öðrum hætti á einhverjum tímapunktum í starfinu og barnabörnin eru fimmti ættliðurinn sem fær að njóta þeirrar dýrðar sem til dæmis Vatnaskógur hefur upp á að bjóða. - Algjörlega ómetanlega dýrmætt og þakkarvert.

Þjálfun í lífsleikni

Höfundur er ljóðskáld og rithöfundur og aðdáandi lífsins.