Húnavaka er fjölskylduviðburður þar sem Húnvetningar sem og aðrir gestir njóta góðra stunda með vinum og vandamönnum yfir helgi á Blönduósi. Í ár verður Húnavaka sett við Hafíssetrið fimmtudaginn 16. júlí. Í kjölfarið, líkt og síðustu ár munu bæjarbúar svo koma saman og grilla í gamla bænum. Dagskráin sem boðið verður uppá þetta árið er hin glæsilegasta og ættu allir að geta fundið eitthvað við sitt hæfi. Bæjarbúar hafa sameinast um að skreyta bæinn af kostgæfni og leggja sitt að mörkum til að hátíðin verði sem ánægjulegust.

Blönduós laðar að sér ferðamenn sem koma allstaðar að, enda með eindæmum fallegt bæjarstæði. Náttúruperlan Hrútey, fallegt útsýni við ósa Blöndu og fjölbreytt fuglalíf á svæðinu gerir Blönduós að kjörnum áfangastað stað fyrir unnendur náttúrunnar. Blönduós hefur einnig uppá mikið að bjóða þegar kemur að menningu og listum. Meðal annars má nefna Heimilisiðnaðarsafnið við bakka Blöndu sem laðar að sér marga ferðamenn á ári hverju sem og Kvennaskólann, en þar setjast að listamenn frá ýmsum löndum til að vinna að hugmyndum innblásnum af umhverfi Blönduóss. Í Kvennaskólanum má einnig finna Vatnsdælurefilinn og Minjastofu Kvennaskólans. Að auki er boðið uppá að skoða lifandi laxfiska í Laxasetrinu og fræðast um sögu hafíss í Hafíssetrinu.

Blönduós stendur fyrir fjölbreyttum viðburðum og menningarstarfi og iðar því að lífi, einkum yfir sumartímann. Í sumar voru Smábæjarleikar Arion banka haldnir í tólfta skipti og var fimmta Landsmót UMFÍ 50+ einnig haldið á Blönduósi í ár svo eitthvað sé nefnt. Að auki má finna framúrskarandi sund- og íþróttaaðstöðu í íþróttamiðstöðinni sem er mikið notuð af bæði íbúum Blönduóss og afkomendum. Einnig er vert að minnast á prjónagraffið sem setur fallegan svip á Blönduós í ár, en íbúar Blönduóss hafa staðið fyrir þessum gjörningi í sumar við góðar viðtektir.

Gestir Blönduóss hafa fjölbreytta möguleika þegar kemur að því að finna næturstað en hér er að finna vel staðsett tjaldstæði, sem og hótel, gistihús og sumarhús. Á Blönduósi má einnig finna veitingastaði og kaffihús sem taka vel á móti svöngum gestum bæjarins.

Blönduós er sannarlega staður þar sem allir í fjölskyldunni ættu að geta fundið eitthvað við sitt hæfi og býður uppá fjölbreytta möguleika hvort sem það kemur að afþreyingu, gistiaðstöðu eða veitingum.

Ég býð ykkur velkomin til Blönduós

Arnar Þór Sævarsson, sveitarstjóri Blönduósbæjar