Kæru íbúar Blönduósbæjar.

Ég heiti Svanur Ingi Björnsson og ég býð mig fram fyrir L-listann í komandi sveitastjórnarkosningum.

Fyrir þá sem ekki  vita hver ég er, er ég 26 ára drengur og sonur Hönnu Kristínar Jörgensen og Björns Svans Þórissonar. Ég stunda nám við lögreglu- og löggæslufræði við Háskólann á Akureyri og starfa tímabundið sem lögreglumaður hjá Lögreglustjóranum á Norðurlandi vestra.

Í  námi mínu er mikið fjallað um öryggismál og lærum við mikið um hvernig best er að haga umferð bíla og gangandi vegfaranda með sem öruggustum hætti og hef ég mikið horft til okkar bæjarfélags í þeim málum.

Fyrst ber að nefna að Vegagerðin stóð sig vel við að laga brúnna okkar hér síðasta sumar og á hrós skilið fyrir þá framkvæmd. Einnig hefur Vegagerðin gefið grænt ljós á það að malbika þjóðveg 1 í gegnum Blönduós í sumar. En að mínu mati  er það ekki nóg. Gangandi umferð á brúnni þarf að fara og ætlum við í L-listanum að halda áfram að þrýsta á Vegagerðina  að halda áfram þeirri framkvæmd sem hafin er. Mikilvægt er að  fá göngubrú fyrir neðan núverandi brú og þá með þeim möguleika að breikka brúna enn meira fyrir akandi umferð. Með þessu er bæði verið að auka öryggi gangandi vegfarenda og bílaumferðar. Þetta sé ég sem kost fyrir alla.

Við þjóðveg 1 hér á Blönduósi má m.a. finna sumarhúsabyggð og tjaldstæði. Fólkið sem dvelur þar þarf að þvera þjóðvegin fyrir alla þjónustu ef þau fara gangandi og hefur ekki kost á því að fara yfir á gangbraut.

Í leiðbeiningum frá Vegagerðinni um þjóðvegi í þéttbýli kemur eftirfarandi fram ,,umferð óvarinna vegfarenda á akbraut hefur áhrif á umferðaröryggi allra vegfarenda. Því er mikilvægt að stígar séu til staðar meðfram þjóðvegum í þéttbýli.” Í 27. grein vegalaga nr. 80/2007 segir „Í samgönguáætlun er heimilt að veita fé til almennra hjólreiða]  og göngustíga meðfram umferðarmestu þjóðvegum samkvæmt sérstakri áætlun sem gerð skal að höfðu samráði við sveitarfélög.

Ég tel því  mjög mikilvægt að við beitum okkur fyrir því að fá gangbrautir og gangstíga sem bæði eykur öryggi gangandi vegfarenda og hægir á umferðinni í gegnum bæinn.

Ég hef mikinn áhuga á auknu öryggi vegfaranda, jafnt gangandi, hjólandi eða akandi og legg mikla áherslu á þau málefni.

Endilega komdu við á kosningaskrifstofu L - listans og ræddu við mig um öryggismál eða önnur málefni sem brenna á þér.

Kæru kjósendur. Hér vil ég búa og hér hyggst ég búa mér til heimili til frambúðar. Öryggi vegfaranda er mér mjög mikilvægt og þess vegna bið ég þig kæri kjósandi að setja X við L á kjördag og gefa mér tækifæri á því að vera rödd íbúa þegar kemur að umferðar- og öryggismálum.

Svanur Ingi Björnsson
10.  sæti L - listans