Ég er fæddur fyrir að verða 40 árum síðan, alinn upp á Skagaströnd og hef búið þar stærsta hluta lífs míns. Það er þó farið að styttast ansi mikið í að það breytist þar sem ég hef búið á Blönduósi með henni Þórdísi minni í 18 ár.

Fyrst leist mér satt best að segja ekkert á það og var sú búseta aldrei hugsuð öðruvísi en tímabundið úrræði. Ég var á sjó, og Þórdís mín að vinna hjá Bryndísi Braga á hárgreiðslustofunni. Í landlegum skutlaði ég Þórdísi til vinnu og fór svo beint á bryggjuna, heim á Skagaströnd.
Árin liðu og við fluttum úr blokkinni yfir á með viðkomu á Mýrarbraut, Skúlabraut og Sunnubraut áður en við komum okkur fyrir á Heiðarbrautinni þar sem við búum nú mörgum árum og þrem drengjum síðar.

Á þessum tíma hefur margt breyst, ferðunum út á Skagaströnd fór fækkandi samhliða því að vina og kunningjahópurinn á Blönduósi fór stækkandi og þá sérstaklega eftir að ég lagði sjómennskuna á hilluna fyrir að verða 3 árum síðan. Hugmyndin um tímabundið búsetuúrræði á Blönduósi fjaraði hægt og bítandi út og hefur ekki verið rædd um þónokkuð skeið.

Eins og og ég var harðákveðinn í því að ég myndi aldrei búa á Blönduósi ætlaði ég mér aldrei annað en að vinna við sjómennsku, hafandi aflað mér bæði vél og skipstjórnar menntunar auk þess að þekking mín reynsla og áhugamál var á þessu sviði.

Þrátt fyrir allt skráði ég mig til náms í fiskeldisfræði við Háskólann að Hólum og er svo að klára sjávarútvegsfræðina við Háskólann á Akureyri. Farinn að vinna í landi og allt lítur bara nokkuð vel út verð ég segja.

Þó svo að rútínan og reglan sé á margan hátt góð verður að segjast að breytingar geta líka verið góðar, í mínu tilfelli bara mjög góðar oft á tíðum. Ég bý í sveitarfélagi sem mér líður vel í og ég er ánægður að getað lifað og starfað í nágrenni við fjölskyldu mína og vini með fast land undir fótum og gott fólk í kringum mig og okkur, og trúið mér það hefur reynt á það og ég tala af reynslu þegar ég segi að það er gott fólk í kringum okkur.

Á næstkomandi laugardag eru liðin 50 ár frá því að skipt var úr vinstri akrein yfir í hægri. Breytingarnar gengu ekki alveg áfallalaust fyrir sig, reiðhjólamaður varð fyrir hnjaski og hjólið skemmdist umtalsvert. Þrátt fyrir það var haldið áfram og breytingarnar gengu í garð. Ekki eru uppi háværar raddir þess efnis að hverfa í fyrra horf, en vafalaust væru einhverjir til.

Á laugardaginn næstkomandi gefst okkur tækifæri til að "skipta um akrein" og fela stjórnsýslu sveitarfélagsins í hendur fólks sem er uppfullt af áhuga og tilbúið að leggja sig í líma til bæta samfélagið sem þau og þið búið í.

Ungt fólk með reynslu úr atvinnulífinu sem er tilbúið að láta gott af sér leiða og vinna að uppbyggingu samfélagsins sem þeim þykir vænt um og vilja búa í.

Óslistinn samanstendur af frábærum einstaklingum sem hafa víða og praktíska reynslu í leik og starfi sem nýtast myndu til uppbyggingar og eflingar á annars okkar frábæra sveitarfélagi. Við munum standa vörð um og efla þjónustu við íbúa, við munum veita innspítingu í atvinnulífið og laða að nýja atvinnuvegi sem svo vissulega er þörf á.

Við skjótum á að úrslit komandi kosninga geti ráðist af örfáum atkvæðum sem gerir það ennþá mikilvægara að kjósa eftir sinni bestu sannfæringu.

Ég leita til þín kjósandi góður og óska eftir að mér verði veitt brautargengi til þess að geta starfað að hagsmunum sveitarfélagsins á næstu misserum, þitt atkvæði gæti skipt sköpum.

Jón Örn Stefánsson 4. sæti Óslistans X-Ó