Þegar unglingurinn hafði matast, reis hann á fætur til að blása rjóður í þykka héluna á glugganum. Faðir hans var nýgenginn út að gefa fénu dagsgjöfina áður en presturinn og kirkjufólkið kæmi. Móðir hans kom framan úr eldhúsinu með kolafötu til að bæta í ofninn í stofunni. Hann var ekki farinn að sjá út þegar hún fór að bera matarílátin fram af borðinu.

Þetta söguupphaf segir frá sunnudegi á kirkjustaðnum og við Hlíðhreppingar köllum meira segja kirkjustaðinn Bergsstaði því höfundur sögunnar ólst upp á þeim bæ og við sjáum fyrir okkur foreldra hans, stutta konu og skerpulega að bæta á eldinn en föðurinn Halldór, hávaxinn hæglætismann, genginn út til gegninganna. Lýsing prestsins á við engan annan en séra Gunnar á Æsustöðum og eftir honum beið unglingurinn í sögunni. Presturinn hvatti unglinginn til skrifta og láta sig lesa, hann gæti alltaf leiðrétt stafsetningarvillur. Þetta töluðu þeir þegar þeir gengu saman ofan á veginn.

Fyrir allmörgum áratugum hittum við fyrir prestsfjölskyldur heima á mörgum kirkjustöðum: Bergsstöðum, Blöndudalshólum, Auðkúlu, Hjaltabakka, Undirfelli, Höskuldsstöðum og Hofi. Í glæsta og hljómandi Blönduóskirkju þarf ekki að bera kol til að hlýja hana upp. Kirkjan fyllist af fólki við fermingar og útfarir. Og þangað kemur fjöldi ferðamanna á sumrin og líklega fram á vetur ef við gefum okkur tíma til að taka á móti þeim. Blönduósbær er svo ríkur að meðal íbúanna eru nokkrir sem skipta á milli sín sumarvikunum og gæta kirkjunnar í 5 klukkutíma hvern dag. Og gefa vinnu sína. Þökk sé þeim. Annar hópur kemur til kirkju á hverju miðvikudagskvöldi og æfir söng í 2 klukkutíma. Oftast eru það sálmar, en kórinn æfir líka Húnabyggð, Smávinir fagrir, Þú komst í hlaðið og fleiri ættjarðarlög. Svo syngur kórinn í messum, fer upp í baðstofuna á Heilsustofnuninni á aðfangadag og skírdag og syngur messu með vistmönnum og sjúklingum.

Þessi kór er öfundsverður af sinni hlýju og rúmgóðu kirkju en líka af mörgum sópranröddum. Það er óskastaða allra kóra en það er líka gott fólk í hinum röddunum, svona 2-3 í rödd en við getum bætt við fleiri röddum. Líka í sópraninn þó fleiri séu þar fyrir, því þá geta þær sungið af enn meiri mýkt.

Verið velkomin. Formaður kórsins er Þórhalla skólastjóri s. 8924928 en organistinn Ingi Heiðmar s. 8652586.

Til upplýsinga: Fyrsta æfing er miðvikudagskvöldið 24. sept. kl. 20

Smásagnasafn Guðmundar Halldórssonar frá Bergsstöðum heitir Hugsað heim um nótt, en sagan sem vitnað er í heitir Messudagur.

Í byrjun ágústmánaðar hófst söfnun vísna á vefinn Húnaflói - Kvæða og vísnasafn: http://bragi.info/hunafloi/