"Í Kristi Jesú eru allir fjársjóðir speki og þekkingar fólgnir. Verið því rótfest á honum byggð á honum, staðföst í trúnni og auðug að þakklátsemi," segir Páll Postuli í bréfi sínu til Kolosumanna á sínum tíma. Og frelsarinn Jesús hvetur okkur til að vera stöðug í bæninni og þreytast ekki á að biðja. Hann segir: "Guð mun skjótt rétta hlut sinna útvöldu sem hrópa á hann dag og nótt." "Biðjið og yður mun gefast."

Ævigangan er fjallganga, ferðalag, ljóðasafn, endalaus áskorun sem við erum kölluð til hvert með sínum hætti. Takk, Guð, fyrir alla þá sem eru og hafa verið á bæn. Takk fyrir öll þau sem leggja sig fram í þágu kærleika Guðs fyrir heilagan anda Jesú Krists og gefa af sér. Eru andlega örlát af náð í auðmýkt og kærleika. Takk fyrir kirkjuna þína og þau sem þar koma saman og leggja lið. Alla listina, tónlistina, sönginn, orðin, ljóðin, myndmálið, sögurnar og vitnisburðina.

Lífæð sálarinnar

Bænin, söngur og tónlist ásamt sögum, ljóð- og myndlist er eitthvað það dásamlegasta, dýpsta og dýrmætasta sem okkur mannfólkinu hefur verið gefið. Söngurinn og tónlistin til að mynda næra svo vel og græða sálina. Og með bæninni kemst jafnvægi á hugann og friður tekur að færast í hjartað.

Fyrir mér er bænin lífæð sálarinnar. Allt það súrefni sem þarf til þess hreinlega að komast af. Mér finnst bænin vera kvíðastillandi og streitulosandi. Hún styrkir fjölskyldubönd, er nærandi, líknandi og læknandi. Með henni taka áhyggjur að líða á braut og friðurinn að flæða inn. Það er einhvern veginn ekkert sem sameinað okkur getur meira og betur en óendanleg samstaða í bæn, í Jesú nafni. Það bara gerist eitthvað alveg óútskýranlegt.

Fegurðin og friðurinn kemur með bæninni

Ég verð þó að viðurkenna að ég veit eiginlega ekkert almennilega hvað bænin er eða hvernig hún virkar. En hitt veit ég af því að ég hef upplifað það svo margoft og iðulega sjálfur að mér finnst ósegjanlega gott að fá að hvíla í henni. Fá að meðtaka fyrirgefninguna, friðinn og kærleikann, náðina og vonina sem í henni er fólgin og henni fylgir.

Því það er mín sannfæring að fegurðin og friðurinn komi með bæninni. Þegar við köfum inn í okkar innsta kjarna. Bænin er nefnilega uppspretta bættra samskipta, virðingar, skilnings og samstöðu, sé hún beðin af einlægni hjartans og í auðmýkt. Í henni finnum við til eilífrar núvitundar.

Fegurðin býr þar sem fyrirgefning, réttlæti og friður faðmast. Og fegurðin er fingrafar Guðs í þessum heimi, og þú þar með talið.

Takk óskiljanlegi, Guð, fyrir að mega þiggja þann leyndardóm að gjöf sem lífið er og ég skil ekki. Takk, Guð, fyrir að mega meðtaka það, lifa því og njóta þess, þrátt fyrir allt.

Með einlægri kærleiks- og friðarkveðju.

- Lifi lífið!

Höfundur er ljóðskáld og rithöfundur og aðdáandi lífsins.