Mynd: forlagid.is
Mynd: forlagid.is
Pistlar | 25. febrúar 2024 - kl. 15:42
S├Âgukorn: F├Žrast fj├Âllin st├│ru
Eftir Inga Hei├░mar J├│nsson
  1. Stöldrum við í Mjódd á fimmtudaginn, ljóðalestur kl. 14, kleinukaffi kl. 15, minningar kvika svo allan daginn og alla daga, utan Mjóddar sem innan, flestar norðan úr Flóanum bjarta og ísgjarna, en þar una þó ær í hlíðum, selir í víkum, kýr á engjum, fuglar í klettum, hross í haga og laxar í hyljum.
     
  2. Jónas orti sjaldan dróttkvætt – og þó:

    Arfi lýtur orfi
    allar rósir falla
    stutta lífið styttir
    sterkur karl í verki
    heft er hönd á skafti
    hrífan létt mér ettir
    glymur ljárinn, gaman!
    grundin þýtur undir. JH

     
  3. Einn afkomenda sr. Zóphóníasar í Viðvík og Goðdölum hefur tekið saman sýnisbók af dróttkvæðum – okkur til dundurs og ánægju sem áður námum, lásum og – oftast – gleymdum. Bókarhöfundur á líka ömmu og afa í Rósu og Guðjóni á Marðarnúpi og eitt af frægum skáldum fyrri tíða var Hallfreður vandræðaskáld úr Vatnsdal. Þeir Kormákur Miðfirðingur ortu margt ástaljóð, torráðin nú og brúðkaup þeirra skáldanna lentu í útideyfu. Var þó meira ort.
     
  4. Heitast hellur fljóta
    hvatt sem korn á vatn,
    enn emk auðspöng ungri
    óþekkr, en bjöð sökkva,
    færask fjöll in stóru
    fræg í djúpan ægi
    auðs áðr jafnfögur tróða
    alin verði Steingerði. Kormákur Ögmundarson

     
  5. Jóhanna Soffía prestsfrú í Viðvík var sonarbarn Péturs á Víðivöllum svo við komumst nær skáldinu Jónasi sem nam latínu með Víðivallabræðrum hjá Goðdalapresti áður en hann fór suður yfir heiðar til náms í Bessastaðaskóla.
     
  6. Og Jóhanna Soffía er langamma höfundar sýnisbókarinnar og aðalgests okkar í Ljóðhúsum í Mjódd á hlaupársdegi 29. febr.: Gunnar Skarphéðinsson heitir hann, er magister í íslensku og hefur kennt bæði unglingum í Varmahlíð og nemendum í Verslunarskóla Íslands.
     
  7. Pétur prófastur á Víðivöllum var skáldmæltur, sjáum þessa barnagælu,  orta í orðastað barns:

    Litli Gráni leikur sér
    lipurt hefur fótatak
    babbi góður gaf hann mér
    gaman er að skreppa á bak. PP

    Sit ég undir svefnþurfandi silkinönnu
    ófeiminn það ýtum kynni
    Elínborgu dóttur minni. PP

    Ber mig lengra bænum frá,
    beisladýrið móða.
    Ég vil fara að hátta hjá
    hjartanu mínu góða. PP

     
  8. Samkoman verður 29.2. í Safnaðarheimili Breiðholtskirkju kl. 14, gengið inn að sunnan, þar sem Gunnar Skarphéðinsson les og gerir grein fyrir nokkrum dróttkvæðum og Þorsteinn Guðmundsson segir frá ábúendatali úr Húnaþingi sem hann er að taka saman og setja inn á vefinn.

Ítarefni:
Endursögn á Kormáksvísu: https://bragi.arnastofnun.is/hunafloi/visur.php?VID=25019
Fleiri vísur Péturs á Víðivöllum: https://bragi.arnastofnun.is/hofundur.php?ID=15340

Góð kveðja. IHJ

Höf. rzg

Húnahornið - Fréttavefur allra Húnvetninga