Haldin verður hópslysaæfing í umdæmi lögreglustjórans á Norðurlandi vestra á laugardaginn. Æfingin fer fram ofan við Blönduós, á gatnamótum Ennisbrautar og Neðribyggðarvegar. Ennisbraut verður því lokuð við Mýrarbraut og Þverárfjallsveg frá klukkan 11 og fram eftir degi. Reikna má með að bifreiðum sem ætlaðar eru til neyðaraksturs verði ekið með forgangsmerkjum á þessum tíma um Ennisbraut og Húnabraut að fjöldahjálparstöð og söfnunarsvæði slasaðra sem verður í Íþróttamiðstöðinni á Blönduósi.

Sagt er frá þessu á facebooksíðu lögreglunnar á Norðurlandi vestra. Þar segir að æfingar sem þessar séu bráðnauðsynlegar til að æfa viðbragð og stjórnskipulag. Reikna megi með því að heildarfjöldi þeirra sem að æfingunni komi muni verða vel á annað hundrað. Þar sé um að ræða viðbragðseiningar úr Skagafirði og báðum Húnavatnssýslum.