Magnús Jónsson hefur verið ráðinn í nýtt starf verkefnastjóra hjá Samtökum sveitarfélaga á Norðurlandi vestra. Hlutverk nýs verkefnisstjóra verður að vinna að því að laða fjárfestingar inn í landshlutann með það fyrir augum að fjölga atvinnutækfærum og auka fjölbreytni þeirra. Starfið er sérstakt áhersluverkefni Sóknaráætlunar landshlutans og er liður í samningi milli SSNV og atvinnuvega- og nýsköpunarráðuneytisins sem undirritaður var í september 2019. Þetta kemur fram í tilkynningu frá SSNV.

Magnús er viðskiptafræðingur að mennt, hefur auk þess lokið PMD stjórnendanámi og er vottaður vátryggingafræðingur. Í tilkynningunni segir að hann hafi víðtæka reynslu af rekstri, markaðsmálum og fjárfestingum sem framkvæmdastjóri Framtakssjóðs Landsbankans, sérfræðingur í fyrirtækjaviðskiptum, útibússtjóri Landsbankans, umdæmisstjóri VÍS á Norðurlandi og stjórnarmaður nokkurra fyrirtækja. Í störfum sínum hafi hann meðal annars öðlast mikla reynslu á greiningum á fýsileika verkefna sem og áhættugreiningu sem nýtist vel í starfinu.

"Ég er mjög spenntur að takast á við þetta spennandi en um leið krefjandi verkefni. Ég hef þá trú að á Norðurlandi vestra séu mikil tækifæri til sóknar og ný Sóknaráætlun landshlutans sýnir svo ekki verður um villst að hugur íbúa er sá sami. Undanfarið hefur íbúum á svæðinu verið að fjölga, húsbyggingar eru víðast á svæðinu komnar af stað aftur eftir langt hlé og metnaðarfullar fjárfestingar nokkurra aðila á liðnum árum gefa til kynna áhuga á svæðinu. Það er því góður grunnur til staðar og ég hlakka til að slást í hóp öflugra starfsmanna SSNV í því verkefni að byggja ofan á þann grunn," segir Magnús í tilkynningu frá SSNV.

Magnús hefur störf hjá SSNV í lok mars.