Framkvæmdastjórn Heilbrigðisstofnunar Norðurlands hefur tekið ákvörðun um að loka sjúkra- og hjúkrunardeildum fyrir heimsóknum ættingja og annarra gesta þar til annað verður formlega tilkynnt. Lokunin hefur þegar tekið gildi, að því er fram kemur í tilkynningu frá HSN. Er þetta gert að höfðu samráði við sóttvarnayfirvöld eftir að neyðarstigi almannavarna var lýst yfir vegna COVID-19 veirunnar. 

Heilbrigðisstofnun Norðurlands rekur sjúkra- og hjúkrunarrými á Húsavík, Fjallabyggð,  Sauðárkróki og Blönduósi og eru skjólstæðingar flestir aldraðir og/eða með undirliggjandi sjúkdóma og því í sérstökum áhættuhópi að veikjast alvarlega af kórónaveirunni. Í tilkynningunni segir að leitað sé allra leiða til að draga úr hættu á að íbúar á hjúkrunardeildum og sjúklingar á sjúkradeildum veikist og sé lokunin liður í því. Við sérstakar aðstæður megi leita undanþágu hjá yfirhjúkrunarfræðingum á hverjum stað og er bent á nánari upplýsingar á www.hsn.is fyrir staðbundnar upplýsingar.

HSN bendir fólki einnig á að kynna sér upplýsingar og leiðbeiningar á vef Landlæknisembættisins www.landlaeknir.is um stöðu mála, en þær geta breyst frá degi til dags.