Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, og Guðmundur Ingi Guðbrandsson, umhverfis- og auðlindaráðherra, gerðu í dag grein fyrir úthlutun fjármuna til uppbyggingu innviða, náttúruverndar og annarra verkefna á ferðamannastöðum árið 2020. Samtals er nú úthlutað rúmum 1,5 milljarði króna úr Landsáætlun um uppbyggingu innviða og Framkvæmdasjóði ferðamannastaða sem gerir kleift að halda áfram því mikilvæga verkefni að byggja upp innviði á ferðamannastöðum.

Verkefni í Húnavatnssýslum sem fá úthlutun úr verkefnaáætlun Landsáætlunar 2020-2022 eru Borgarvirki, Hvítserkur og Þrístapar. Veittar eru 3 milljónir í lokaáfanga uppbyggingar í Borgarvirki. Hvítserkur fær 18 milljónir í innviðauppbyggingu í samráði við landeigendur og sveitarfélagið og til Þrístapa renna 2,5 milljón til lagfæringar minja, bætta upplýsingagjöf um fornminjar á staðnum.

Á vef Stjórnarráðsins er nánar fjallað um úthlutun fjármuna til náttúruverndar á ferðamannastöðum.