Búið er að virkja aðgerðarstjórnstöð almannavarna fyrir Norðurland vestra vegna Covid-19 faraldursins og er hún skipuð fulltrúum viðbragðsaðila og heilbrigðisstofnana. Aðgerðarstjórnstöðin er staðsett á Sauðárkróki og sér hún um að samhæfa og stýra aðgerðun í umdæminu. Í tilkynningu segir að lögð hafi verið áhersla á að vinna að samræmingu á viðbrögðum heilsugæslu, sveitarfélaga og viðbragðsaðila.

Skipulagið snýr að því að hægt sé að sinna þeim sem sýkjast og þeim sem mögulega gætu verið sýktir, ýmist í heimahúsi, í sóttkvíarhúsi eða á sjúkrastofnunum. Einnig miðast skipulagið við að tryggt sé að innviðir samfélagsins og mikilvæg fyrirtæki og stofnanir geti áfram starfað.

Skipaðar hafa verið þrjár vettvangsstjórnir, í Skagafirði, Austur-Húnavatnssýslu og Vestur-Húnavatnssýslu. Hlutverk þeirra er að stýra aðgerðum á hverju svæði fyrir sig og framkvæma skipulag og ákvarðanir aðgerðarstjórnstöðvar. 

„Mikilvægt er að öll fyrirtæki og stofnanir komi sér upp neyðaráætlunum og skipi sér neyðarstjórnir, þar sem að starfsemin er skipulögð þannig að lágmarkað sé að fjöldi starfsmanna veikist og að starfsemin geti haldið áfram þó svo að hluti starfsmanna veikist. Mun AST kalla eftir slíkum áætlunum í næstu viku,“ segir í tilkynningu frá almannavörnum á Norðurlandi vestra sem lesa má hér á Húnahorninu.