Sprenging varð í sumarbústað í Langadal, nærri bænum Geitaskarði, um klukkan ellefu í morgun. Sex voru í bústaðnum þegar sprengingin varð, allt ungt fólk. Þrír voru fluttir á slysadeild á Akureyri. Tveir þeirra voru með sjáanlega áverka. Ekki er þó talið að þeir séu í lífshættu. Sagt er frá þessu á vef Ríkisútvarpsins.

Þar kemur fram að lögreglan á Norðurlandi vestra hafi fengið tilkynningu um sprenginguna klukkan ellefu mínútur yfir ellefu í morgun. Fjölmennt lið lögreglu, slökkviliðs og björgunarsveita fór á vettvang frá Blönduósi og Skagaströnd. Einnig var óskað eftir aðstoð frá Sauðárkróki og Hvammstanga en sú beiðni var afturkölluð.

Sumarbústaðurinn er í fjallshlíð og þurfti vel búna jeppa til að komast að honum. Losa þurfti fólk úr braki bústaðarins þegar björgunarfólk kom á staðinn. Þrír voru fluttir á sjúkrahús, sem fyrr segir, og þremur komið fyrir á öruggum stað til að jafna sig. Þar er hlúð að fólkinu.

Á vef Ríkisútvarpsins segir að tæknideild Lögreglunnar á höfuðborgarsvæðinu sé á leiðinni norður til að rannsaka slysstaðinn. Björgunarsveitarmenn séu á staðnum þar til tæknideildin komi á staðinn.