Nemendum í Höfðaskóla stendur til boða að mæta með skóflur í skólann til þess að moka frá útidyrahurðum, göngustígum og ruslatunnum hjá íbúum Skagastrandar. Mikið hefur snjóað á Skagaströnd og í ljósi óvenjulegra aðstæðna í samfélaginu, sem bitnar m.a. á skólahaldi, var ákvörðun tekin um þetta samfélagsverkefni. „Við vonum að þið takið vel í þetta verkefni hjá okkur, við kennum krökkunum samheldni og samfélagslega ábyrgð með þessu. Ljóst er að krakkarnir komast ekki yfir allan bæinn en munu reyna sitt besta til að hjálpa sem flestum,“ segir á vef Höfðaskóla.

Að sjálfsögðu er öllum sóttvarnarreglum fylgt, nemendur fara saman í þeim hópum sem þeir tilheyra í skólunum og eiga ekki að hafa samskipti við íbúa húsa.