Búið er að stofna síðu á Facebook sem nefnist Rafíþróttir í Húnaþingi. Aðstandendur hennar eru Jóhannes Gunnar Þorsteinsson á Kollafossi og Aðalsteinn Grétar Guðmundsson. Í færslu á síðunni segir Jóhannes að þeir félagar að verið að prófa sig áfram með hugmyndir um rafíþróttafélag á svæðinu. Vegna atburða síðustu daga í Húnaþingi vestra hafi þeir ákveðið að spýta í lófana til að koma þessu félagsstarfi í gang. „Tölvuleikir geta nefnilega boðið upp á félagslega nánd og tengingu án líkamlegrar nánd, sem að er svo mikilvægt þessa dagana.“

Fram kemur að þeir félagar ætla að byrja á því að bjóða upp á leikjahittinga á netinu á laugardögum klukkan 15-17 til að byrja með. Á hverjum laugardegi verður einhver leikur fyrir valinu sem að flestir ættu að geta spilað. Næstkomandi laugardag, 21. mars, verður leikurinn Krunker.io spilaður.

Leikinn er hægt að spila í gegnum vafra (mælum með Google Chrome) á jafnvel aflminnstu tölvum með því að fara á síðuna www.krunker.io. „Á laugardaginn mælum við með því að fólk tengist við Discord hópinn okkar og komi í hljóðspjall áður en leikurinn byrjar. Hægt er að ganga í Discord hópinn hér. https://discord.gg/4FDkkjN.“

Þá segir á Facebook síðunni að einnig sé verið að undirbúa Minecraft: Java Edition netþjón sem verður opinn 24 tíma dagsins og komist hann vonandi í gagnið á næstu dögum. Það verði auglýst frekar síðar. „Þar ættum við að geta hist og látið sköpunargáfu okkar blómstra með sveitungum okkar.“

„Við viljum einnig benda á að fullorðnir eru að sjálfsögðu einnig velkomnir, og þá sérstaklega foreldrar. Núna er fullkominn tími til þess að kynnast tölvuleikjunum sem að börnin ykkar spila og elska. Núna er hið fullkomna tækifæri til þess að kynnast áhugamáli þeirra,“ segir í færslu á Facebook síðunni Rafíþróttir í Húnaþingi.

Gangið í Facebook hópinn okkar hér https://www.facebook.com/Raf%C3%AD%C3%BEr%C3%B3ttir-%C3%AD-H%C3%BAna%C3%BEingi-105274547633592/

Gangið í Discord hópinn okkar þar sem hægt er að spjalla í rauntíma með hljóði og texta hér https://discord.gg/4FDkkjN