Forseti Íslands hefur sent íbúum Húnaþings vestra hlýjar kveðjur og góðar óskir í kjölfar þess að Covid-19 smit kom upp í sveitarfélaginu. „Við stöndum núna í ströngu saman, þjóðin öll. Saman munum við vinna bug á veirunni skæðu. Blessunarlega hafa ekki fleiri greinst með veikina sem henni fylgir á ykkar heimaslóðum en annars staðar á landinu. Á hinn bóginn hafa óvenjumargir þurft að fara í sóttkví í varnaðarskyni og það hefur sín áhrif í litlu og nánu samfélagi,“ segir í bréfinu.

Forsetinn sendir bréfið fyrir hönd þeirra hjóna biður sveitarstjóra Húnaþings vestra að koma á framfæri góðum kveðjum til allra í sveitarfélaginu. „Nú gildir samhugur og samstaða sem aldrei fyrr. Ég veit að þið öll munið áfram sýna hvað í ykkur býr. Við Eliza óskum ykkur alls velfarnaðar,“ segir að lokum í bréfinu sem sjá má á vef Húnaþings vestra.