Blönduósbær ætlar að koma til móts við þá sem verða fyrir tekjutapi á næstu mánuðum vegna áhrifa frá Covid-19 faraldrinum, óski þeir þess. Hægt verður að fresta gjalddögum fasteignagjalda sem sett hafa verið á næstu þrjá mánuði, þ.e. 1. apríl, 1. maí og 1. júní, um sjö mánuði. Vegna röskunar á þjónustu stofnana sveitarfélagsins, svo sem hjá leikskóla, grunnskóla, skóladagheimili og mötuneyti og fleiri þess háttar, hefur sveitarstjóra verið falið að endurskoða innheimtu með tilliti til notkunar og skerðingar þjónustunnar, að lágmarki fimm virka daga samfellt. Frá þessu er greint í fundargerð sveitarstjórnar frá fundi hennar í gær.

Þar kemur einnig fram að sveitarstjórn finnst eðlilegt að tímalengd áskrifta að aðgangskortum sem nú eru í gildi, framlengist sem lokun nemur. Sveitarstjórn ætlar að skoða fleiri leiðir til að bregðast við ástandinu.