Um helgina fór fram fyrsta Arctic Coast OPEN mótið á skotíþróttasvæði Skotfélagsins Markviss við Blönduós. Tíu keppendur tóku þátt í mótinu og komu þeir frá fimm skotfélögum en ljóst er að veðurfar hafði neikvæð áhrif á fjölda keppenda að þessu sinni. Mótið gekk vel fyrir sig þrátt fyrir kalsarigningu og norðan gjólu á laugardaginn en í gær stytti upp og voru aðstæður hinar bestu.

Í B-flokki sigraði Daníel Logi Heiðarsson úr Skotfélagi Akureyrar. Í öðru sæti varð Elías M. Kristjánsson úr Skotfélagi Akraness og í þriðja sæti varð Kristinn Rafnsson úr Skotíþróttafélagi Hafnarfjarðar.

Í A-flokk vann Guðmann Jónasson úr Skotfélaginu Markviss eftir harða og hnífjafna baráttu við G. Braga Magnússon úr Skotfélagi Akureyrar og Jakob Þór Leifsson úr Skotíþróttafélagi Suðurlands.