Sýni sem voru tekin til að kanna hvort enn væri mengun í neysluvatni á Hvammstanga týndust í flutningum. Á vef Húnaþings vestra kemur fram að þetta verði til þess að niðurstöður seinki fram á mánudag en ný sýni voru tekin í gær. Þangað til niðurstaða liggur fyrir eru íbúar beðnir að halda áfram að sjóða vatn fyrir neyslu.

Í dag er rúmlega vika liðin síðan upp komst um mengunina í annarri vatnslindinni við Hvammstanga þar sem jarðvegsgerlar fundust í vatninu. Þeir eru ekki skaðlegir fólki nema í miklu magni. Síðan þá hafa íbúar þurft að sjóða allt sitt neysluvatn og þurfa enn, a.m.k. fram á mánudag. Sveitarstjórnin biðst afsökunar á þeim óþægindum sem þetta kann að valda og þakkar íbúum skilninginn.