Opnað verður fyrir framtalsskil einstaklinga 2023, vegna ársins 2022, miðvikudaginn 1. mars næstkomandi. Framtalið verður aðgengilegt á þjónustuvef Skattsins, www.skattur.is, og ber öllum sem náð hafa 16 ára aldri í lok árs 2022 að skila skattframtali og telja fram. Lokaskiladagur er 14. mars.

Fram kemur á vef Skattsins að boðið verður upp á að panta símtal og fá aðstoð við framtalsgerð í gegnum síma, en engin framtalsaðstoð verður í afgreiðslum Skattsins. Framtalsleiðbeiningar 2023 eru tilbúnar og komnar á vefinn ásamt bæklingi með einföldum framtalsleiðbeiningum þar sem stiklað er á stóru yfir það helsta sem einstaklingar þurfa að huga að við skil á skattframtali.

Notast þarf við rafræn skilríki eða veflykil til auðkenningar inn á þjónustuvefinn við innskráningu. Ef fólk lendir í vandræðum með framtalið getur það einnig haft samband við framtalsaðstoð í síma 442 1414 eða senda fyrirspurnir á netfangið framtal@skatturinn.is.