Áfangastaðurinn Norðurland vestra 2030 er heiti á opnum fundi sem haldinn verður í Miðgarði miðvikudaginn 2. mars næstkomandi klukkan 16-18. Á fundinum mun Hjörtur Smárason hjá Saltworks kynna niðurstöður verkefnis, sem hann hefur unnið fyrir Samtök sveitarfélaga á Norðurlandi vestra undanfarna sex mánuði.

Kynntar verða tillögur að stefnumótun fyrir ferðaþjónustuna á Norðurlandi vestra út frá stöðu og samkeppnishæfni og hvernig ímynd svæðisins getur virkað á íbúaþróun og atvinnumál. Þá verða tillögur reifaðar um hvernig styrkja megi ímynd svæðisins og gera það að aðdráttarafli fyrir nýja og brottflutta íbúa, til góðs fyrir samfélagið og atvinnulífið.