Á fundi sveitarstjórnar Skagabyggðar í síðustu viku var samþykkt að endurauglýsa deiliskipulagstillögu í Kálfshamarsvík. Ekkert deiliskipulag er til staðar en talin er þörf á slíku skipulagi meðal annars vegna síaukins fjölda ferðamanna um svæðið. Markmið með deiliskipulaginu er að bæta aðstöðu fyrir ferðamenn og aðgengi þeirra sem sækja Kálfshamarsvík heim. Til að tryggja að verndargildi svæðisins rýrni ekki er nauðsynlegt a byggja upp innviði og fræða gesti um umgengnisreglur sem um svæðið gilda. Greinargerð með deiliskipulagstillögunni má lesa hér.

Deiliskipulagssvæðið er um 20 hektarar að stærð og er í samræmi við gildandi aðalskipulag. Skipulagssvæðið nær yfir allt landsvæði Kálfshamarsnes sem er í eigu sveitarfélagsins Skagabyggðar og að hluta til yfir landsvæði Saura sem nefnist Holtin, auk Framness sem er norðan Kálfshamarstjarnar. Einnig er land innan skipulagssvæðisins í landi Kálfshamars sem er austan Kálfshamarstjarnar.

Kynning á deiliskipulagstillögunni verður á bæjarskrifstofu Blönduósbæjar miðvikudaginn 1. mars klukkan 10-12.

Frestur til að skila inn ábendingum og athugasemdum rennur út 7. apríl næstkomandi og skal þeim skilað á netfangið skipulagsfulltrui@hunathing.is eða með bréfpósti stílað á skipulagsfulltrúa Skagabyggðar Hvammstangabraut 5, 530 Hvammstanga.

Sjá nánar á vef Skagabyggðar, www.skagabyggd.is.