Miklar loðnutorfur hafa óvænt fundist norður af Húnaflóa og tilkynnti Hafrannsóknastofnun í gær að búast mætti við að minnsta kosti eitthundrað þúsund tonna aukningu loðnukvótans. Viðbótin gæti skilað tíu milljarða króna útflutningsverðmæti. Rannsóknarskipið Árni Friðriksson sinnti rannsóknum dagana 12.-21. febrúar í Húnaflóa en endalegar niðurstöður leiðangursins liggja ekki fyrir og ný veiðiráðgjöf verður því ekki tilbúin fyrr en í byrjun næstu viku.

Í ljósi þess að núna er langt liðið á loðnuvertíðina upplýsir Hafrannsóknastofnun á vef sínum að umtalsvert magn af hrygningarloðnu mældist á landgrunninu norður af Húnaflóa sem var ekki komið á mælisvæðið þegar fyrri mæling fór fram. „Ljóst er að mælingar undanfarinna daga munu leiða til hækkunar á tillögum um hámarksafla á loðnuvertíðinni 2022/2023. Varlega áætlað má gera ráð fyrir yfir 100 þúsund tonna hækkun ráðlags hámarksafla,“ segir á vef stofnunarinnar.

Loðnan sem mældist úti fyrir Húnaflóa var 3-4 ára loðna sem komin var tiltölulega nálægt hrygningu, með tæplega 16% hrognafyllingu syðst en tæp 12% utar. Það er mat Hafrannsóknastofnunar að þessi loðna muni líklegast hrygna á þessum slóðum.