Húnabyggð hefur fengið 900 þúsund króna styrk úr Lýðheilsusjóði vegna tveggja verkefna; Heilsueflandi Húnabyggð og Allir með. Úthlutað var úr sjóðnum föstudaginn 24. febrúar í húsakynnum Íþrótta- og Ólympíusambands Íslands. Úthlutað var rúmum 86 milljónum króna til 150 verkefna og rannsókna. Styrkt voru fjölbreytt verkefni um land allt, ætluð öllum aldurshópum.

Áhersla er lögð á að styrkja aðgerðir sem miða m.a. að því að efla geðheilsu barna og fullorðinna og efla félagsfærni ásamt því að draga úr einmanaleika. Einnig var áhersla á áfengis-, vímu- og tóbaksvarnir, næringu, hreyfingu og kynheilbrigði. Við mat á umsóknum var einnig sérstaklega horft til verkefna sem styðja við minnihlutahópa, stuðla að jöfnuði til heilsu og tengjast nýsköpun á sviði forvarna og heilsueflingar, að því er segir á vef Embættis landlæknis.

Verkefnið Heilsueflandi Húnabyggð fékk 500 þúsund króna styrk og verkefnið Allir með fékk 400 þúsund króna styrk.

Hér má sjá lista yfir úthlutanir Lýðheilsusjóðs.