Í ársbyrjun tóku Ragnhildur Ásta Ragnarsdóttir og Dagur Freyr Jónasson við búinu Norðurhaga. Ragnhildur er 19 ára sem gerir hana að yngsta bónda landsins en hún tekur við búinu af foreldrum sínum og er þar með fjórði ættliðurinn sem hefur búskap á jörðinni. Ríkissjónvarpið veitti þessu athygli og mætti í Norðurhaga til að ræða við Ragnhildi um þessi tímamót.

„Ég hef búið hérna alla mína ævi og alltaf haft það á bak við eyrað að kaupa,“ segir Ragnhildur í samtali við Ríkissjónvarpið. Kindurnar eru það sem heillar mest við búskapinn, og bændurnir ungu stefna að því að fjölga sauðfé með árunum.

Ragnhildur segir óvænta athygli hafa fylgt því að verða yngsti bóndi landsins. Hún sé almennt ekki mikið fyrir kastljósið, en vill nýta tækifærið til að hvetja jafnaldra sína til að gefa sveitinni séns. „Það er gott að koma því á framfæri að fólk sem er 19 geti þetta líka. Bændur eru ekki endilega bara gamlir karlar.“

Hér má sjá innslag Ríkissjónvarpsins í kvöldfréttum 3. mars síðastliðinn.