Í 18 ár hafa skólahreystimótin verið líkt og vorboðinn ljúfi en eins og flestir ættu að vita eru þau liðakeppni milli grunnskóla landsins. Skólahreystilið Grunnskóla Húnaþings vestra tók þátt í riðlakeppni Skólahreysti á dögunum og náði þar frábærum árangri. Þau lentu í öðru sæti eftir að hafa sigrað í tveimur keppnisgreinum. Sagt er frá þessu á vef Húnaþings vestra.

Þar kemur fram að Fróði sigraði dýfukeppnina með hvorki meira né minna en 51 dýfu. Nóa sigraði hreystigreipina með því að hanga í heilar 13 mínútur. Auk Fróða og Nóu voru í liðinu Bríet, Egill, Saga og Friðrik. Þjálfarar voru sem fyrr Magnús og Sara íþróttakennarar. Þrátt fyrir þennan góða árangur dugði hann ekki til að komast í úrslit.