Fjárfestahátíð Norðanáttar var haldin á Siglufirði nýverið en þangað mættu helstu fjárfestar landsins til fundar við frumkvöðla sem vinna að verkefnum tengdum auðlinda-, orku- og umhverfismálum. Hátíðin er vettvangur fyrir frumkvöðla og fyrirtæki sem leita eftir fjármagni og eru tilbúnir að fá fjárfesta að borðinu. Þá er markmið hátíðarinnar einnig að draga fram tækifæri til uppbyggingar á atvinnuvegum og efla nýsköpun í kringum auðlindir landsbyggðanna, en þarna gefst gott tækifæri til þess að mynda tengingar og eiga fyrsta skrefið í átt að framtíðarsamvinnu.

Búið var að velja átta fyrirtæki sem komu frá öllum landshlutum til þátttöku á hátíðinni og að auki eitt gestaverkefni frá Færeyjum. Á vef Norðanáttar má sjá ítarlega umfjöllunum hátíðina.

FoodSmart Nordic var fulltrúi Norðurlands vestra á hátíðinni og kynnti Viðar Þorkelsson framkvæmdastjóri starfsemi félagsins fyrir fjárfestum og öðrum gestum. Félagið framleiðir hágæða vatnsrofið prótein úr sjávarfangi, m.a. kollagen og sæbjúgna duft. Fersku hráefnin koma úr nærumhverfi sem styður við gæði, sjálfbærni og hringrásarhagkerfið. Á seinasta ári var ný verksmiðja fyrirtækisins tekin í notkun á Blönduósi en nýtt húsnæði varð til þess að framleiðslugeta jókst. Rannsóknarsetur félagsins hefur undanfarin ár verið staðsett á Skagaströnd og þar hefur staðið yfir tilrauna framleiðslu á kollageni, sem er eitt helsta uppbyggingarefni líkamans, ásamt sæbjúgnadufti og fiskpróteinum úr íslenskum þorski.

Að verkefninu Norðanátt standa EIMUR og landshlutasamtökin á Norðurlandi SSNE og SSNV með stuðningi frá Umhverfis-, orku-, og loftslagsráðuneytinu. Hraðið, miðstöð nýsköpunar á Húsavík kemur einnig að verkefninu.