Þorgerður Ása Aðalsteinsdóttir söngkona og Ásta Soffía Þorgeirsdóttir harmonikkuleikari gera íslenskum tangó skil í tali og tónum á tónleikum í Blönduóskirkju föstudaginn 19. apríl klukkan 18. Fyrstu tónleikar þeirra með sömu efnisskrá fóru fram í Hörpu síðastliðið haust og þóttu stórskemmtilegir. Ásta Soffía á ættir að rekja í Víðidalinn en amma hennar hét Soffía Jónsdóttir og var frá Nípukoti.

Í tilkynningu frá Þorgerði Ásu og Ástu Soffíu segir: „Blómaskeið íslenskrar tangótónlistar var um miðbik síðustu aldar. Margir þekktir lagahöfundar sömdu falleg tangólög og má í þeim hópi nefna til dæmis Oddgeir Kristjánsson, Bjarna Böðvarsson, Friðrik Jónsson, Vilhelmínu Baldvinsdóttur og Tólfta september. Sum laganna njóta enn vinsælda í dag á meðan önnur eru gleymdari.“

Þær vonast til að sjá sem flesta í Blönduóskirkju 19. apríl.

Miðaverð er 3.500 krónur.

Miðasala er á Tix.is og við dyrnar.