Það hefur líklega ekki farið framhjá mörgum að framundan eru forsetakosningar. Forsetaframbjóðandinn Halla Hrund Logadóttir verður á ferð og flugi um Norðurland í vikunni og býður heimamönnum til opinna funda og samtals um embætti forseta Íslands. Tveir fundir verða í Húnavatnssýslum, í Víðigerði og á Blönduósi.

Í tilkynningu frá Höllu Hrund kemur fram að hún stefnir að því að fara meira um Norðurland á næstu vikum og heimsækja fleiri staði. Fundirnir í þessari vikur eru þessir:

• Mánudagurinn 29. apríl kl. 12: Opinn fundur á North West, Víðigerði
• Mánudagurinn 29. apríl kl. 17: Opinn fundur á Apótekarastofunni, Hótel Blönduósi
• Mánudagurinn 29. apríl kl. 20: Opinn fundur á Kaffi Króki, Sauðárkróki
• Þriðjudagurinn 30. apríl kl. 20: Opinn fundur á Mói Bistró, Menningarhúsinu Hofi, Akureyri
• Miðvikudagurinn 1. maí kl. 12: Opinn fundur á Sel – Hótel Mývatn í Mývatnssveit
• Miðvikudagurinn 1. maí kl. 20: Opinn fundur í Félagsheimili Framsýnar, Húsavík
• Fimmtudagurinn 2. maí kl. 20: Opinn fundur á Kontornum, Grenivík

Í tilkynningunni segir: „Halla Hrund býður sig fram til embættis forseta Íslands sem fulltrúi almennings, fulltrúi fólksins í landinu. Í embætti forseta vill hún halda gildum þátttöku og samvinnu á lofti og leggja áherslu á samstöðu okkar sem þjóðar, náttúru okkar, menningu og hugvit — fyrir framtíðina. Á opnum fundum á Norðurlandi mun Halla Hrund fara nánar yfir það hvers vegna hún býður sig fram og hvaða sýn hún hefur á embætti forseta Íslands í íslensku samfélagi og á alþjóðavettvangi. Þau sem hafa áhuga á að kynnast Höllu Hrund og framboði hennar betur eru hvött til að mæta og hitta hana.“