Einu sinni, einu sinni enn.!! Þorrablót Vökukvenna verður haldið 23. Janúar n.k. fyrsta laugardag í Þorra.

Undanfarin tæplega 40 ár hef ég verið þeirrar ánægju aðnjótandi að skunda til gleðifundar á Þorrablóti þeirra Vökukvenna með örfáum undantekningum.

Það er ekkert sjálfgefið að nokkrar konur í jafn litlu  samfélagi og  okkar skuli leggja það á sig að halda úti slíkri skemmtun ár eftir ár. Að vísu eru þær ekki einar því þær hafa haft lag á því að laða til sín aðstoðarfólk sem á ekki síður þakkir skildar fyrir þeirra framlag.

Eftir því sem árin haf liðið hefur fækkað þeim skemmtunum sem höfða til jafn breiðs aldurshóps og þorrablótin gera, því þegar ég flutti aftur á Blönduós eftir nokkurra ára fjarveru voru við líði fjölda skemmtana sem maður mátti alls ekki missa af. Svo sem Jónsmessuhátíð bænda, Vegagerðarballið, Styrktarsjóðsballið, hjónaballið, að maður tali nú ekki um Húnavökuna þar sem maður varð helst að fara á miðvikudagsballið (peysufataballið) sem haldið var síðasta vetrardag og svo föstudagsballið en að sjálfsögðu var laugardagsballið sem markaði lok Húnavöku algerlega ómissandi.

Nú er svo komið að það er eiginlega bara Þorrablótið sem stendur undir nafni sem samkoma þar sem allir aldurshópar koma saman, borða dásamlegan mat og njóta frábærrar skemmtunar þar sem gert er góðlátlegt grín að samborgurunum og árið  gert upp.

Einhvern veginn hefur mér fundist áhuginn fyrir þessu þorrablóti hafa minnkað að undanförnu sem mér finnst mjög miður og því vil ég hvetja alla, sem annt er um að samfélagið okkar standi undir nafni, til að  láta  sig ekki vanta á næsta þorrablót. Þar á ég við Blönduósinga alla, innfædda, aðflutta, brottflutta sem og nágranna okkar alla sem vilja koma og njóta frábærrar skemmtunar. Þetta er kjörið tækifæri til að hittast og gleðjast, njóta samvista, rifja upp gömul kynni og stofna til nýrra.

Samfélag okkar verður aldrei betra en fókið sem það byggir og þess vegna verðum við að standa saman, og það að hittast og gleðjast á góðum stundum er hluti af því að gera gott samfélag betra.

Fjölmennum á Þorrablót Vökukvenna 23. Janúar 2016.

Margrét Einarsdóttir