,,Það er bara frábært fyrir okkur að fá að hýsa þetta mót sem hefur svo sannarlega rutt sér til rúms.Það má segja að Landsmót UMFÃ� 50+ sé orðið stór hluti af sumri okkar Ã�slendinga, að taka þátt og keppa í fallegu umhverfi . Þetta mótshald gerir ekkert annað en að þjappa okkur saman þar sem allir leggjast á eitt til að gera þetta sem best úr garði. Það er mikil ánægja í samfélaginu að taka þátt í þessu, að undirbúa og skipuleggja mótið,“ sagði Arnar Þór Sævarsson, bæjarstjóri á Blönduósi.

Arnar Þór sagði að það hefði blundað í þeim í svolítinn tíma að fá þetta mót á Blönduós. Þeir hefðu verið á þröskuldinum í nokkur skipti en svo hefði verið tekin ákvörðun um að slá til, að henda sér í djúpu laugina og halda mótið.

 „Við teljum okkur vera vel undirbúin og munum skila þessu vel af okkur, ég er sannfærður um það. Þetta á eftir að fara inn í reynslubankann og er um leið mikil auglýsing fyrir bæinn okkar. Við höfum á að skipa mögnuðu liði sem skipuleggur móthaldið af kostgæfni. Sveitarfélagið notar svo tækifærið samhliða þessu til að fara  út í framkvæmdir, laga og fegra,“ sagði Arnar Þór.

Arnar Þór var spurður hvernig íþróttalíf og íþróttaaðstaða væri á Blönduósi.

„Margir hafa haft orð á því, sem koma inn í svona lítið samfélag, hvað íþróttaaðstaða okkar er alveg frábær. Við eigum stórt og flott íþróttahús, fína og góða sundlaug sem margir segja að sé sú besta og fallegasta á  landinu, hvorki meira né minna. Við höfum ennfremur yfir að ráða glæsilegum íþróttavelli með sætum og öllu tilheyrandi. Við teljum okkur vel í sveit sett í þessum efnum hvað alla aðstöðu snertir. Okkur er ekkert að vanbúnaði að halda svona mót og við hlökkum mikið til. Nú er bara að vona að veðurguðirnir verði með okkur en á þessu svæði ríkir oft veðursæld. Það er ótrúlegt hvað veðrið er oft gott hér en Blönduós er einn þurrasti stað á landinu þannig að vonandi á veðrið eftir að leika við okkur,“ sagði Arnar Þór.

Arnar Þór sagði mikla stemningu vera fyrir mótinu og að honum fyndist frábært að þessi aldurhópur þjappaði sér saman og skellti sér eina helgi út á land til etja kappi saman í góðum hópi. Ungmennafélagsandinn sé þarna í fyrirrúmi, aðalmálið er að vera með og þannig á þetta að vera. Arnar Þór sagist sjálfur hafa verið í fótbolta og körfubolta. Hann fer í ræktina og reynir eftir bestu getu að hreyfa sig.

„Ég er bara viss um að mótið á eftir að verða okkur til framdráttar til lengri tíma litið. Ég er sannfærður um að þetta verður flott mót og metnaður er mikill innan okkar raða til að gera þetta eins vel og hægt er. Við héldum hér á Blönduósi Unglingalandsmót sem við búum að þannig að það var kominn tími til að ráðast í næsta verkefni þegar kemur að íþróttum. Öll aðstaða er fyrir hendi og við horfum björtum augum fram á veginn. Tilhlökkunin er mikil og þetta verður bara gaman og spennandi,“ sagði Arnar Þór Sævarsson, bæjarstjóri á Blönduósi.