� vikunni var á Akureyri kynnt verkefni um að skapa sérstakt vörumerki fyrir veginn meðfram strandlengjunni frá Sauðárkróki til Vopnafjarðar, ef áhugi væri fyrir slíku hjá ferðaþjónustufyrirtækjum á þeirri leið. Sérstakur starfshópur með fulltrúum úr landshlutanum hefur unnið að verkefninu undanfarið en markmiðið er að skapa tækifæri til markaðssetningar og fjölga ferðamönnum á þessari leið.

Talsverð umræða hefur verið um málið á meðal Húnvetninga á Facebook og furða margir sig á af hverju vegurinn í verkefninu sé ekki látinn ná yfir allt Norðurland, þ.e. fyrir Skagann og Vatnsnes líka og til Hvammstanga eða Borðeyrar.

� samtali við Ríkisútvarpið segir verkefnisstjórinn Christiane Stadler að markmiðið sé að dreifa ferðamönnum betur á önnur svæði, eins og Melrakkasléttu, og að skapa sterkt markaðstæki til að kynna Norðurland á innlendum og erlendum markaði.

Fram kemur í frétt Ríkisútvarpsins að leiðin eigi að byrja á Sauðárkróki og þaðan sé keyrt meðfram strandlengjunni til Hofsóss, fyrir Tröllaskaga og til Akureyrar. Þaðan sé svo keyrt til Grenivíkur og þar snúið við, og farið í gegnum Ljósavatnsskarð og til Húsavíkur. Þar heldur vegurinn meðfram strandlengjunni áfram alla leið til Vopnafjarðar. � leiðinni hafa ferðamenn tækifæri til að skoða sjávarþorp og kynnast því hvernig samfélögin í þessum þorpum urðu til. Sömuleiðis væri hægt að bjóða upp á ýmiss konar upplifun á leiðinni, líkt og er gert nú þegar. Verkefnið er nú í þróun og endanlegt vörumerki fyrir leiðina er ekki tilbúið, en Stadler segist vongóð um að þetta verði að veruleika.