„Almennt séð má segja að varaafl sé langt frá því að vera nægilegt í landshlutanum. Í einhverjum tilfellum kemur það til af því að stofnanir sem reka raforkukerfið hafa stórlega vanmetið stöðu kerfisins og staðhæft að varafls sé ekki þörf. Hafa bæði stofnanir/fyrirtæki og bændur fengið slíka ráðgjöf.“ Þetta segir í svari Samtaka sveitarfélaga á Norðurlandi vestra við spurningu átakshóps stjórnvalda vegna óveðursins í desember og finna má í samantekt sem gerð var fyrir átakshópinn.

Átakshópurinn bað samtökin að leggja mat á tiltækt varaafl í landshlutanum og stýringu þess við aðstæður eins og sköpuðust í óveðrinu. Þá var beðið um tillögur til úrbóta. Í svari samtakanna segir m.a. að ekki sé tiltækt varafla á öllum heilbrigðisstofnunum og er Heilbrigðisstofnun Vesturlands á Hvammstanga nefnd sem dæmi. Einnig segir að ekki séu varaaflsstöðvar í öllum þéttbýliskjörnum eða aðgengi að þeim tryggt. Á Skagaströnd sé t.d. varaflsstöð en lykill að henni sé geymdur á Blönduósi. Ekki var fært á milli þessara staða í óveðrinu. Þá segir að almennt séð séu fyrirtæki ekki með tiltækt varaafl.

Samtökin leggja til eftirfarandi aðgerðir til úrbóta:

• Bæta þarf afhendingaröryggi raforku á svæðinu bæði með styrkingu flutningslína á svæðið og dreifikerfis.
• Tryggja þarf nægilegt varaafl í landshlutanum:
  • Allir þéttbýlisstaðir hafi varaafl og þar sem þörf er á skömmtun rafmagns liggi fyrir áætlanir um með hvaða hætti skömmtun fer fram.
  • Allar heilbrigðisstofnanir, lögregla og aðrir viðbragðsaðilar hafi varaafl.
  • Tryggja þarf framboð minni rafstöðva sem hægt er að flytja með skömmum fyrirvara þangað sem þeirra er þörf, svo sem á svæði sem eru án hitaveitu og til kúabænda sem margir urðu fyrir stórtjóni í veðrinu.
  • Þar sem varaaflstöðvar eru til staðar þarf að tryggja að á viðkomandi stað sé aðgengi að þeim, þær prófaðar reglulega, vélum við haldið og kunnátta til að ræsa þær til staðar.
  • Tryggja þarf aðgengi að olíu til að knýja varaaflstöðvar. Birgðatankar eru ekki lengur til staðar á svæðinu og olíubirgðir að mestu takmarkaðar við birgðatanka afgreiðslustöðva. Tryggja þarf að hægt sé að afgreiða olíu á þessum stöðvum við þær aðstæður sem sköpuðust.

Samantekt Samtaka sveitarfélaga á Norðurlandi vestra fyrir átakshóp stjórnvalda vegna óveðursins í desember er hér.