Framkvæmdir eru komnar á skrið í reiðhöllinni í Arnargerði en hún verður 20 ára 11. mars næstkomandi. Í síðasta mánuði óskaði stjórn Hestamannafélagsins Neista eftir aðstoð frá félagsmönnum, sem og öðrum, við að koma reiðhöllinni í betra horf og stóð hún fyrir vinnuhelgi um síðustu helgi. Á vef Neista segir að vaskir Neistafélagar hafi mætt og létu þeir hendur standa fram úr ermum og hófu framkvæmdirnar.

Þar segir að búið sé að rífa út innréttingar og henda ónýtum húsbúnaði. Salurinn hefur nú verið málaður að mestu leyti og er málningarvinna á salernum í gangi. Frekari málningarvinna er á döfinni þar sem einnig á að mála anddyri reiðhallarinnar. Stjórn Neista þakkar sérstaklega fyrir alla þá aðstoð sem fékkst um helgina en bendir jafnframt á að enn sé mikið verk fyrir höndum. „Það er hægt að finna verkefni fyrir alla, bæði lengri, styttri, þyngri eða léttari. Margar hendur vinna létt verk!“ segir á vef Neista en þar má sjá myndir frá framkvæmdahelginni.

Tengd frétt:

Komum reiðhöllinni í betra horf fyrir 20 ára afmælið