Sveitarfélagið Skagaströnd hefur síðustu misseri unnið að uppbyggingu ferðaþjónustu meðal annars með þátttöku í Cruise Iceland með það fyrir augum að fá skemmtiferðaskip til þess að koma við á Skagaströnd. Á sveitarstjórnarfundi 24. apríl síðastliðinn lagði sveitarstjóri fram minnisblað vegna hugmynda um hönnun og byggingu heitra lauga og sjóbaða við Hólanes. Þá var lögð fram kostnaðaráætlun upp á 5,6 milljónir króna vegna forgreiningar og gerð húsrýmisáætlunar vegna verkefnisins.

Alexandra Jóhannesdóttir, sveitarstjóri á Skagaströnd, segir að það sé nauðsynlegt að styrkja innviði ferðaþjónustu til þess að trekkja að ferðamenn, bæði erlenda og innlenda. „Við sjáum fyrir okkur að heitar laugar eða sjóböð geti skapað aðdráttarafl fyrir bæði Skagaströnd og Norðurland vestra í heild sinni.“

Hún segir að verkefnið sé á frumstigum og að næstu skref séu að gera forkönnun á aðstæðum og húsrýmisáætlun fyrir væntanleg mannvirki til þess að fá betri sýn á umfang verkefnisins og tækifærum í tengslum við það.