Grunnskóli Húnaþings vestra var á meðal þátttakenda í úrslitum Skólahreysti 2020 sem fram fór í Laugardalshöll á laugardaginn. Eftir harða keppni milli átta grunnskóla stóð Lindaskóli í Kópavogi uppi sem sigurvegari, annað árið röð. Í öðru sæti varð Heiðarskóli í Reykjanesbæ og Árbæjarskóli hafnaði í þriðja sæti. Grunnskóli Húnaþings vestra stóð sig vel og endaði í fjórða sæti.

Aðrir skólar sem tóku þátt voru Flóaskóli, Grunnskólinn á Hellu, Heiðarskóli, Lundaskóli og Varmahlíðarskóli. Allir höfðu skólarnir unnið sér inn keppnisrétt í gegnum sex undankeppnir vetrarins. Þar komst efsti skólinn úr hverri undankeppni áfram auk þeirra tveggja skóla sem stóðu sig best þar fyrir utan. Sem fyrr var keppt í fimm greinum. Upphífingum og dýfum í strákaflokki en armbeygjum og hreystigreipi stúlknaflokki. Blönduð lið skólanna kepptu svo í hraðaþrautinni.

Lindaskóli fékk 43 stig á úrslitakvöldinu, Heiðarskóli 37 stig og Árbæjarskóli 32. Grunnskóli Húnaþings vestra fékk 30 stig en í liðinu voru þau Ásdís Aþena Magnúsdóttir sem keppti í armbeygjum og hreystigreip, Guðmundur Grétar Magnússon sem keppti í upphífingum og dýfum og í hraðaþrautinni kepptu þau Rakel Gígja Ragnarsdóttir og Hilmir Rafn Mikalesson.