Minningarskilti um Björn Þóri Sigurðsson, Bangsa eins og hann var gjarnan nefndir, verður afhjúpað á Hvammstanga á sjómannadaginn, sunnudaginn 7. júní næstkomandi. Athöfnin hefst með messu á Bangsatúni klukkan 13 þar sem sr. Magnús Magnússon, sóknarprestur á Hvammstanga, þjónar og prédikar. Kirkjukór Hvammstanga syngur undir stjórn Pálínu Fanneyjar Skúladóttur organista. Að lokinni messu verður minningarskiltið afhjúpað og síðan verður boðið upp á veitingar undir bláhimni.

Sagt er frá þessu á baksíðu Morgunblaðsins í dag. Þar kemur fram að kótilettunefnd þriggja félaga í Húnaþingi vestra; Lionsklúbbsins Bjarma á Hvammstanga, kvenfélagsins Bjarkar á Hvammstanga og Húsfreyjanna á Vatnsnesi, hafi ákveðið snemma árs 2019 að koma upp minnismerki um Bangsa. Hann bjó alla tíð á Hvammstanga og var ókvæntur og barnlaus. Hann lét til sín taka á ýmsum sviðum, var til dæmis í byggingarvinnu, þó aðallega múrverki, bátasmíði, á sjó og í rækjuvinnslu. Hann andaðist haustið 2018, 83 ára að aldri.

Sr. Magnús segir í samtali við Morgunblaðið að Bangsi hafi verið „gangandi kærleikur, gat allt og var allra. Hann var hvunndagshetja sem kom eins fram við alla, gæðasál sem setti mark sitt á mannlífið með jákvæðum hætti.“