Lögreglunni Norðurlandi vestra hafa borist áreiðanlegar upplýsingar þess efnis að hlaupbangsar eða hlaupkubbar sem innihalda fíkniefni séu í umferð á svæðinu. Í tilkynningu segir að þarna sé um grafalvarlegt mál að ræða en eins og nýleg dæmi sanni sé þarna um að ræða mjög hættuleg efni. Lögregla lítur málið alvarlegum augum og biður fólk um að vera á varðbergi gagnvart þessum ófögnuði. Ef einhverjir kunna að búa yfir upplýsingum um málið þá er skorað á þá að hafa samband við lögregluna.

Í tilkynningunni kemur einnig fram að þrjú fíkniefnamál hafi komið upp á svæðinu síðan á mánudag og að þau séu öll upplýst.

Vakin er athygli á því að allar upplýsingar eru meðhöndlaðar sem trúnaðarmál. Eins má koma upplýsingum nafnlaust í Upplýsinga-/fíkniefnasímann 800 5005. Einnig má hafa samband í gegnum netfangið info@rls.is.