Viðskiptahraðallinn Til sjávar og sveita sækir Sauðárkrók heim föstudaginn 12. júní og býður áhugasömum að sækja stutta vinnustofu um þróun viðskiptahugmynda. Til sjávar og sveita býður upp á metnaðarfullan vettvang til vöruþróunar fyrir verkefni sem snúa að matvælaiðnaði, nýjum lausnum í landbúnaði og haftengdum iðnaði og betri nýtingu hráefna þar sem sjálfbærni og nýsköpun eru höfð að leiðarljósi.

Hraðallinn, sem hefur göngu sína í annað sinn næsta haust, er einnig tilvalinn vettvangur fyrir þróun tæknilausna ætlaðar verslun og þjónustu, t.d. greiðslumiðlun, birgðastýringu, flutningi o.þ.h. sem snýr að því að koma vörum í hendur viðskiptavina. Hraðlinum er ætlað að hraða ferlinu frá því að hugmynd kviknar þar til vara er komin á markað.

Dagskráin er þessi:

Kynning á viðskiptahraðlinum Til sjávar og sveita
Sunna Halla Einarsdóttir, Icelandic Startups

Frumkvöðull deilir reynslu sinni af uppbyggingu fyrirtækis og þátttöku í viðskiptahraðli.
Hildur Magnúsdóttir, stofnandi Pure Natura

Viðskiptahugmyndir og mótun þeirra
Freyr Friðfinnsson, Icelandic Startups

Að loknum kynningum verður opið fyrir spurningar og spjall þar sem þátttakendum gefst jafnframt kostur á að kynna hugmyndir sínar stuttlega fyrir starfsmönnum Icelandic Startups, fá endurgjöf og leiðsögn um næstu skref. Léttar veitingar í boði.

Staður: Farskólinn, Faxatorgi á Sauðárkróki. Dagur: 12. júní. Tími: 12-14. 

Viðskiptahraðallinn Til sjávar og sveita er samstarfsverkefni Icelandic Startups og Íslenska sjávarklasans. Bakhjarlar verkefnisins eru Matarauður Íslands, Nettó og Landbúnaðarklasinn.