Undirbúningur að endurskoðun byggðaáætlunar hófst formlega í gær á samráðsfundi sem samgöngu- og sveitarstjórnarráðuneytið hélt með byggðamálaráði, landshlutasamtökum sveitarfélaga, stýrihópi stjórnarráðsins um byggðamál og Byggðastofnun. Við þetta tækifæri opnaði Sigurður Ingi Jóhannsson, samgöngu- og sveitarstjórnarráðherra, samráðsvettvang á vef Byggðastofnunar þar sem allir geta lagt fram hugleiðingar og hugmyndir um mótun, form, inntak og framkvæmd byggðaáætlunar.

Núverandi byggðaáætlun var samþykkt samhljóða í júní 2018 en lögum samkvæmt skal hún endurskoðuð að lágmarki á þriggja ára fresti. Á næsta vori verða því liðin þrjú ár frá samþykkt hennar. Við gerð gildandi áætlunar var haft víðtækt samráð við fjölda haghafa og var m.a. efnt til opinna funda í öllum landshlutum ásamt því að allan vinnslutíma áætlunarinnar var opin samráðsgátt á vef Byggðastofnunar.

Tilgangurinn með samráðsfundinum í gær, sem jafnframt var fjarfundur, var að safna efnivið í stöðumat fyrir núverandi byggðaáætlun, svokallaða grænbók, og fá fram hugmyndir um það hvert á að stefna með nýrri stefnumótandi byggðaáætlun til fimmtán ára og aðgerðaáætlun til fimm ára.

Sjá nánar á vef Stjórnarráðsins.