Blönduósbær auglýsir nú eftir tilboðum í verkið: Göngubrú í Hrútey – Sandblástur og málun 2020. Í verkinu felst sandblástur og málun á stálvirki gömlu Blöndubrúarinnar sem upphaflega var byggð árið 1897. Brúin er í geymslu í malarnámu á Blönduósi og er aðgengi að henni því gott. Hún er um 37,5 metra löng, 4 metra breið og 4,5 metra há, gerð úr stálprófílum og bitum sem hnoðaðir eru saman.

Fyrirhugað er að nýta brúna síðar sem göngubrú út í Hrútey við Blönduós, eins og áður hefur komið fram í frétt Húnahornsins.

Minniháttar viðgerðir á skemmdum stálprófílum í brúnni eru innifaldar.

Helstu magntölur eru: Sandblástur 530 m2. Málun 530 m2. Útboðsgögn verða afhent með rafrænum hætti hjá Stoð ehf. verkfræðistofu á Sauðárkróki, beiðni um útboðsgögn skal berast á netfangið atli@stodehf.is.

Tilboðum skal skila á skrifstofu Blönduósbæjar, Hnjúkabyggð 33, 540 Blönduósi, fyrir kl. 11:00 þriðjudaginn 30. júní 2020, þar sem þau verða opnuð í viðurvist þeirra bjóðenda sem þess óska. Sandblæstri og málun skal að fullu lokið 15. október 2020, verkinu í heild skal lokið 20. október 2020.