Ársreikningur Húnavatnshrepps 2019 var samþykktur á fundi sveitarstjórnar í síðustu viku. Rekstrartekjur námu 469,8 milljónum króna og rekstrargjöld 450,5 milljónum. Rekstrarniðurstaða fyrir afskriftir og fjármagnsliði var jákvæð um 19,3 milljónir en fjárhagsáætlun gerði ráð fyrir 46,5 milljón króna rekstrarafgang. Rekstraniðurstaða eftir afskriftir og fjármagnsliði var neikvæð um 17,6 milljónir króna.

Samkvæmt yfirliti um sjóðstreymi nam veltufé frá rekstri um 9,9 milljónum króna og handbært fé frá rekstri um 29,6 milljónum. Fjárfestingahreyfingar voru neikvæðar um 100,2 milljónir og fjármögnunarhreyfingar voru jákvæðar um 69 milljónir. Afborganir langtímalána námu um 13,8 milljónum en ný lán voru 80 milljónir á árinu.

Í bókun oddvita segir að það séu mikil vonbrigði hve kostnaður við rekstur og viðhaldsframkvæmdir sveitarfélagsins hafi farið langt fram úr áætlunum sem gerðar voru. Fyrir því væru þó margar ástæður. Nefndar eru launahækkanir, gríðarlegur og ófyrirséður kostnaður vegna vinnu KPMG við endurskoðun á rekstri og áætlanagerð, kostnaður vegna málaferla, vanefndir á framlögum vegna Þrístapaverkefnisins og mikill kostnaðarauki vegna hönnunar við framkvæmdir sem sveitarfélagið fór í sem ekki var gert ráð fyrir í viðaukum fjárhagsáætlunar ársins.

Þá segir í bókuninni: „Jafnframt eru það vonbrigði að framlög Jöfnunarsjóðs vegna skólastarfs lækkuðu á milli ára, þrátt fyrir aukinn kostnað við akstur og laun. Það er því ljós að það er mikil áskorun framundan við að halda rekstri og fjárfestingum sveitarfélagsins innan fjárhagsáætlana á árinu 2020 en eins og engin hefur farið varhluta af er íslenskt samfélag að ganga í gegnum eitt mesta samdráttarskeið í manna minnum vegna Covid 19 með tilheyrandi óvissu um tekjur sveitarfélagsins og framlög úr Jöfnunarsjóði.“

Fulltrúar E-lista í sveitarstjórn sátu hjá við afgreiðslu ársreikningsins en þeir telja fjármálastjórnun sveitarfélagsins óábyrga. Í bókun benda þeir á að niðurstöður ársreikningsins séu ansi langt frá samþykktum áætlunum með viðaukum, bæði í rekstri og fjárfestingum. „Rekstrarniðurstaða A og B-hluta er tap upp á 17,6 milljónir króna en áætlun með viðaukum var samþykkt með hagnaði upp á 15 milljónir króna. Rekstrarkostnaður fer 25 milljónir fram úr áætlun sem ekki er hægt að flokka undir aðhald í rekstri,“ segir í bókuninni. Í henni er einnig bent á fjárfestingar fari rúmlega 60% fram úr áætlun, séu 100 milljónir en hafi verið áætlaðar 62 milljónir og að mikilvægt sé að formlegt samþykki liggi fyrir varðandi fjárfestingar.